ජාතික රෝහලේ නියෝජ්‍ය අධ්‍යක්ෂ වෛද්‍ය රුක්ෂාන් බෙල්ලන මහතා සම්බන්ධයෙන් පරීක්ෂණයක් පවත්වන බව සෞඛ්‍ය අමාත්‍ය වෛද්‍ය රමේෂ් පතිරණ මහතා පවසනවා.
සෞඛ්‍ය සුළු සේවකයින් සම්බන්ධයෙන් වෛද්‍ය බෙල්ලන කළ ප්‍රකාශයක් සම්බන්ධයෙන් මෙලෙස පරීක්ෂණයක් පැවැත්වීමට තීරණය කර ඇති බවයි වාර්තා වෙන්නේ.
ඒ අනුව, අදාළ පරීක්ෂණය පැවැත්වීමට සෞඛ්‍ය අමාත්‍යංශයේ ලේකම් විශේෂඥ වෛද්‍ය පාලිත මහීපාල මහතාට සෞඛ්‍ය අමාත්‍යවරයා උපදෙස් දී තිබෙනවා.
අමාත්‍යවරයා මෙහිදී තවදුරටත් අවධාරණය කර ඇත්තේ සෞඛ්‍ය සේවය සඳහා සෑම අංශයක්ම අවශ්‍ය බවයි.
වෛද්‍ය රුක්ෂාන් බෙල්ලන මහතා ජාතික රෝහලේ නියෝජ්‍ය අධ්‍යක්ෂ ධුරයෙන් ඉවත් කරන ලෙස ඉල්ලා අද (19) උදෑසන ද සෞඛ්‍ය සේවා සුළු සේවකයින් විරෝධතාවයක නිරත වී තිබෙනවා.
පසුගියදා, කොළඹ ජාතික රෝහලේ නියෝජ්‍ය අධ්‍යක්ෂ වෛද්‍ය රුක්ෂාන් බෙල්ලන මහතාව සුළු කාර්ය මණ්ඩලයේ සේවකයින් පිරිසක් විසින් බලහත්කාරයෙන් ඔහුගේ කාර්යාලයේ රඳවා ගැනීමට කටයුතු කර තිබුණා.
මේ හේතුවෙන්, කොළඹ ජාතික රෝහලේ උණුසුම් තත්ත්වයක්ද ඇති වූ අතර එම අවස්ථාවේ දී වෛද්‍ය රුක්ෂාන් බෙල්ලන මහතා මාධ්‍ය වෙත අදහස් පළ කරමින් සුළු සේවකයින්ට දැඩි දෝෂාරෝපණයක් එල්ල කළා.
