අධිකරණයට අපහාස කළේ යැයි රක්ෂිත බන්ධනාගාර ගතකර සිටින ආගමන හා විගමන පාලක හර්ෂ ඉලුක්පිටිය මහතාගේ ඇප ඉල්ලීම සලකා බැලීම කල් තබා තිබෙනවා.
ඒ අනුව, මේ මස 29 වන දක්වා එම ඇප ඉල්ලීම කල් තැබීමටයි ශ්‍රේෂ්ඨාධිකරණය නියෝග කර ඇත්තේ.
මෙම ඇප ඉල්ලීම වග උත්තරකරු රක්ෂිත බන්ධනාගාර ගත කළ ප්‍රීති පද්මන් සූරසේන මහතා ප්‍රමුඛ විනිසුරු මඩුල්ල ඉදිරියේ කැඳවන ලෙස තීන්දු කළ විනිසුරු මඩුල්ල අනතුරුව එම නියෝගය නිකුත් කර තිබෙනවා.
හර්ෂ ඉලූක්පිටිය මහතා වෙනුවෙන් පෙනී සිටි ජනාධිපති නීතීඥ සාලිය පීරිස් මහතා කරුණු දක්වමින් ජ්‍යේෂ්ඨ පරිපාලන නිලධාරියකු වන සිය සේවාදායකයා මෙම සි්ද්ධියට අදාළව මේ වන විට මාස හතරක කාලයක් රිමාන්ඩ් භාරයේ රඳවා සිටින හෙයින් ඔහුට ඇප නියම කරන්නැයි ඉල්ලා සිටියා.
ඒ අවස්ථාවේදී අධිකරණය ඇමතූ විනිසුරු මඩුල්ලේ සභාපති විනිසුරු එස්.තුරේරාජා මහතා රජයේ ඉහළ නිලධාරීන් සෑම විටම අධිකරණ නියෝග අනුව කටයුතු කළ යුතු බවයි පෙන්වාදී තිබෙන්නේ.
ඇප ඉල්ලීම සම්බන්ධයෙන් සලකා බැලීමට නොහැකි බව පෙන්වා දුන් සභාපති විනිසුරු එස්.තුරේරාජා මහතා කෙසේ වෙතත් මෙම රිමාන්ඩ් නියෝගය දුන් විනිසුරු මඩුල්ලම ඇප ඉල්ලීම සලකා බැලීම වඩාත් සුදුසු බව පෙන්වා දෙමින් මෙම පෙත්සම් අනිද්දා (29) කැඳවීමට නියම කළා.
