විල්පත්තු රක්ෂිත වනාන්තර ආශ්‍රිතව පිහිටි කැලෑ කපා ඉවත් කිරීම සම්බන්ධයෙන් අභියාචනාධිකරණය විසින් තමන්ට එරෙහිව දී ඇති තීන්දුවක් බලරහිත කරන මෙන් ඉල්ලා හිටපු අමාත්‍ය රිෂාඩ් බදියුදීන් විසින් ඉදිරිපත් කර ඇති අභියාචනයක් සලකා බැලීම සඳහා ජනවාරි මස 19 වන දා කැඳවන ලෙස ශ්‍රේෂ්ඨාධිකරණය ඊයේ (05) නියම කළා.
ඒ, මෙම අභියාචනා පෙත්සම ගාමිණී අමරසේකර, අචල වෙංගප්පුලි සහ අර්ජුන ඔබේසේකර යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ කැඳවූ අවස්ථාවේදීයි.
එහිදී ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලේ සාමාජික විනිසුරුවරයෙකු වශයෙන් කටයුතු කරන අර්ජුන ඔබේසේකර මෙම සිද්ධියට අදාළ අභියාචනාධිකරණ නඩු විභාගය සඳහා ද සහභාගී වී ඇති හෙයින් මෙම පෙත්සම සලකා බැලීම වෙනත් විනිසුරු මඩුල්ලක් වෙත යොමු කිරීමට ශ්‍රේෂ්ඨාධිකරණය නියම කළා. ඒ අනුව පෙත්සම සලකා බැලීම ජනවාරි මස 19 වනදා සිදු කිරීමටයි අධිකරණය නියම කළේ.
විල්පත්තු රක්ෂිත වනාන්තර ආශ්‍රිතව පිහිටා තිබෙන කල්ලාරු රක්ෂිතයේ ගස් කපා ඉවත් කිරීම සම්බන්ධයෙන් පාරිසරික යුක්ති කේන්ද්‍රය විසින් ගොනු කර තිබූ නඩුවක තීන්දුව ලබාදෙමින් අදාළ ප්‍රදේශයේ සිය පුද්ගලික වියදමින් පැල සිටුවීමට පියවර ගන්නා ලෙස අභියාචනාධිකරණය තමන්ට නියෝගයක් නිකුත් කළ බවයි හිටපු අමාත්‍ය රිෂාඩ් බදියුදීන් සිය අභියාචනයේ දක්වා ඇත්තේ.
එම අභියාචනාධිකරණ තීන්දුව දෝෂ සහගත බවත් එය බලරහිත කිරීමේ නියෝගයක් නිකුත් කරන ලෙසත් ඔහු සිය අභියාචනය මගින් ඉල්ලා තිබෙනවා.
