ජාතික රෝහලේ නියෝජ්‍ය අධ්‍යක්ෂ වෛද්‍ය රුක්ෂාන් බෙල්ලනගේ ක්‍රියාකලාපයට විරෝධය පළ කරමින් එළඹෙන 12 වැනිදා දහවල් කෑම පැයේදි දිවයිනේ සියලු රෝහල් ඉදිරිපිට විරෝධතා ක්‍රියාත්මක කරන බව සෞඛ්‍ය වෘත්තිය සමිති සන්ධානය පවසනවා.
මේ අතර, ශ්‍රි ලංකා මහජන සෞඛ්‍ය පරික්ෂකවරුන්ගේ සංගමයේ සභාපති උපුල් රෝහණ ඊයේ (07) පැවති ප්‍රවෘත්ති සාකච්ඡාවකදී පවසා සිටියේ වෛද්‍ය රුක්ෂාන් බෙල්ලනගේ ක්‍රියාකලාපයට විරෝධය දැක්වු ජාතික රෝහලේ වෘත්තිය සමිති නායකයන් අත්අඩංගුවට ගැනීමට පොලිසිය මේ වනවිට උත්සාහ ගනිමින් සිටිනා බවයි.
සෞඛ්‍ය සේවකයන් සිදුකරනු ලබන කිසිදු වෘත්තිය සමිති ක්‍රියාමර්ගයකට මැදිහත්විමට වෛද්‍ය රුක්ෂාන් බෙල්ලනට කිසිදු අවශ්‍යතාවයක් නොමැති බවද ඔහු එහිදී අවධාරණය කර තිබුණා.
වෛද්‍ය රුක්ෂාන් බෙල්ලන කනිෂ්ඨ සෞඛ්‍ය කාර්ය මණ්ඩලය හෙළා දකිමින් සිදුකරනු ලබන ප්‍රකාශ සම්බන්ධව සෞඛ්‍ය අමාත්‍යංශයේ පරිපාලනය දැනුවත් කළද මෙතෙක් ඊට සාධනීය ප්‍රතිචාර නොලැබුණු බවද උපුල් රෝහණ මහතා මෙහිදී පෙන්වා දුන්නා.
එවැනි තත්ත්වයක් තිබියදී පොලිසිය මෙම ගැටලුවට මැදිහත්වී සෞඛ්‍ය වෘත්තිය සමිති නායකයන් අත්අඩංගුවට ගැනීමට උත්සාහ කිරීම පිළිබඳව කනගාටුව පළකරන බවද ශ්‍රී ලංකා මහජන සෞඛ්‍ය පරික්ෂකවරුන්ගේ සංගමයේ සභාපති උපුල් රෝහණ වැඩිදුරටත් සඳහන් කර තිබෙනවා.
