අනුර කුමාර දිසානායක මහතා ප්‍රමුඛ ආණ්ඩුවෙන් මාධ්‍යයට, වෘත්තීය සමිති ව්‍යාපාරයට සහ විපක්ෂයට දැඩි බලපෑම් එල්ල වෙමින් තිබෙන බව හිටපු පාර්ලිමේන්තු මන්ත්‍රී ඩලස් අලහප්පෙරුම මහතා පවසනවා.
ජනාධිපතිවරයා ප්‍රමුඛ ආණ්ඩුව ප්‍රජාතන්ත්‍ර විරෝධි ඒකාධිපති ගමනකට අර අදිමින් සිටින බවයි අලහප්පෙරුම මහතා සඳහන් කළේ.
ඔහු මේ බව කියා සිටියේ, අද (07) කොළඹදී සමගි ජන බලවේගය සංවිධානය කළ මාධ්‍ය හමුවකට එක්වෙමින්.
එහිදී වැඩිදුරටත් අදහස් දැක්වූ ඩලස් අලහප්පෙරුම මහතා:
“ඇතැම් මාධ්‍ය අලුත් වස්ත්‍ර ඇඳ ගත යුතුයි කියා ජනාධිපති අනුර දිසානායක මහතා මාධ්‍යට අනතුරු ඇඟවීමක් සිදුකළා. ඒ වගේම ඇතැම් මාධ්‍ය වල්බූරු නිදහසක් භුක්ති විඳිනවා එය වහාම නතර කරගත යුතුයි කියා මාධ්‍ය විෂය භාර ඇමැතිවරයා ලෙස විජිත හේරත් ඇමතිවරයාත් ප්‍රකාශ කළා. පසුගිය ජනාධිපතිවරණයේදී ජාතික ජන බලවේගයේ නායකයෙක් ප්‍රකාශ කළා ජාතික ජනබලවේගය බලයට පැමිණි පසු ඇතැම් මාධ්‍ය ආයතන වහන්න සිදුවෙයි කියලා. වර්තමානයේ ඇතිවී තිබෙන්නේ ඒ අනතුර දැයි අපට සැකයක් මතුවනවා.
වෘත්තීය සමිති ව්‍යාපාරය අවශ්‍ය නැහැ ඒවා විසුරුවා හැරිය යුතුයි කියලා ආණ්ඩුව ප්‍රකාශ කරනවා. ඒවගේම රටට විපක්ෂයක් අවශ්‍ය නැති බවත් ආණ්ඩුව ප්‍රකාශ කරනවා. පාර්ලිමේන්තුවට ආණ්ඩුවක් පමණක් ප්‍රමානවත් බව ඔවුන් ප්‍රකාශ කරනවා.
