හිටපු පාර්ලිමේන්තු මන්ත්‍රී මහාචාර්ය ආශු මාරසිංහ මහතා මෙවර පාර්ලිමේන්තුවට තේරී පත්වූ මන්ත්‍රීවරුන් 225 දෙනාගේම අධ්‍යාපන සුදුසුකම් මෙන්ම රැකියාව සහ වත්කම් බැරකම් ප්‍රකාශ ඉල්ලමින් තොරතුරු දැනගැනීමේ පනත යටතේ අයැදුම්පත් තුනක් ඉදිරිපත් කර තිබෙනවා.
ශ්‍රී ලංකා පාර්ලිමේන්තුවේ මහ ලේකම්,අල්ලස් හෝ දූෂණ විමර්ශන කොමිෂන් සභාවේ සභාපති සහ මැතිවරණ කොමිෂන් සභාවේ සභාපති වෙතිනුයි ආශු මාරසිංහ මහතා අදාල තොරතුරු ඉල්ලා ඇත්තේ.
2024 මහ මැතිවරණය මත තේරී පත්වූ මන්ත්‍රීවරු 225 දෙනා ලබා දී ඇති අධ්‍යාපන සුදුසුකම් රැකියාව හා වත්කම් බැරකම් ප්‍රකාශ ලබාදෙන ලෙස ආශු මාරසිංහ මහතා තොරතුරු දැන ගැනීමේ පනත යටතේ ඉදිරිපත් කරන ලද අයැදුම් පත්‍රයේ සඳහන් වනවා.
මේ අතර, අල්ලස, දූෂණයට හා නාස්තියට එරෙහි පුරවැසි බලය සංවිධානය ද අද අපරාධ පරීක්ෂණ දෙපාර්තමේන්තුවට පැමිණියා.
ඒ පාර්ලිමේන්තු මන්ත්‍රී නාමල් රාජපක්ෂ 2010 වර්ෂයේදී නීති උපාධිය ලබා ගැනීම සඳහා වංචනිකව විභාග සඳහා පෙනී සිට ඇති බවත් මේ සම්බන්ධයෙන් පරීක්ෂණයක් සිදුකරන ලෙස ඉල්ලමින්.
එමෙන්ම කිසිදු අයුරකින් ආචාර්ය පදවියක් තම නම ඉදිරියෙන් භාවිත නොකළ බවත් එය කිසියම් පිරිසක් විසින් සැලසුම් සහගතව තමන් මෙන්ම සිය දේශපාලන ව්‍යාපාරය අපහසුතාවයට පත් කිරීම සඳහා සිදුකළ අසාර්ථක උත්සහයක් බවත් අධිකරණ සහ ජාතික ඒකාබද්ධතා අමාත්‍ය නීතීඥ හර්ෂණ නානායක්කාර ප්‍රකාශ කළා.
අමාත්‍යවරයා මේ බව කියා සිටියේ අදාළ සිදුවීම සම්බන්ධයෙන් අද පෙරවරුවේ අපරාධ පරීක්ෂණ දෙපාර්තමේන්තුවට පැමිණිලි කිරීමෙන් පසු මාධ්‍ය වෙත අදහස් දක්වමින්.
