මාධ්‍යවේදී චමුදිත සමරවික්‍රම මහතාගේ පිළියන්දල වෑවල නිවසට ගල් සහ අසූචි ප්‍රහාර එල්ල කළ පුද්ගලයන් සම්බන්ධයෙන් තොරතුරක් අනාවරණය කර ගැනීම සඳහා සී.සී.ටී.වි. කැමරා සියයකට අධික සංඛ්‍යාවක දර්ශන පරික්ෂා කළ ද වැදගත් තොරතුරක් අනාවරණය කර ගැනීමට නොහැකි වී ඇති බව වාර්තා වනවා.
පළාගිය රථය පිළිබඳ තොරතුරු ලබා ගැනීම සඳහා දෙහිවල සරණංකර මාවත දක්වා සී.සී.ටී.වී. දර්ශන පරීක්ෂාවට ලක්කල බවයි පොලිසිය පවසන්නේ.
කෙසේ නමුත් චමුදිත සමරවික්‍රම මහතාගේ නිවසට ප්‍රහාරය එල්ල වූ කාලය තුළ සංවාදයේ යෙදුණු දුරකථන ඇමතුම් සම්බන්ධයෙන්ද ඒ ආසන්නයේ පිහිටි දුරකථන කුළුණු හරහා විමර්ශන සිදු කෙරෙන බවයි පැවසෙන්නේ.
මේ සඳහා බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතාගේ උපදෙස් මත ගල්කිස්ස කොට්ඨාස අපරාධ විමර්ශන අංශය ,සහ පිළියන්දල , සහ කැස්බෑව පොලිසි වල ස්ථානාධිපතිවරුන්ගේ ප්‍රධානත්වයෙන් පත්කර තිබෙන කණ්ඩායම් දෙකට අමතරව ගල්කිස්ස කොට්ඨාසයට අනුක්ත බුද්ධි අංශ නිලධාරීන් පනහකට ආසන්න ප්‍රමාණයක්ද යොදවා තිබෙනවා.
ඉකුත් 14 දින දින අලුයම් කාලයේ දී සුදු පාටට හුරු වෑන් රථයකින් පැමිණ තිබූ සිව්දෙනකු යුත් කල්ලියක් මෙම ප්‍රහාරය එල්ල කර පලා ගොස් තිබිණ.
