ඇෆ්ගනිස්තානයට එරෙහිව පනවා ඇති ආර්ථික සම්බාධක ඉවත් කරන්නැයි චීනය ලෝක ප්‍රජාවෙන් ඉල්ලා සිටියි.
චීන විදේශ අමාත්‍ය වැන්ග් යී මෙම ඉල්ලීම සිදුකළේ වීඩියෝ තාක්ෂණය මගින් G20 රටවල විදේශ අමාත්‍යවරුන්ගේ සමුලුව අමතමිනි.
ඇෆ්ගනිස්තානය සතු විදේශ සංචිත හා වත්කම් එරට සම්පතක් බවත් එහි ජනතාවගේ යහපත වෙනුවෙන් එම සම්පත් මුදාහැරිය යුතු බවත් ඔහු මෙහිදී ලෝක ප්‍රජාවට අවධාරණය කර සිටියේය.
දේශපාලන සහ වෙනස් හේතු මත තලේබාන් ඇෆ්ගනිස්තානය ප්‍රතික්ෂේප කිරීමෙන් වැළකී සිටිය යුතු බව ද චීන විදේශ අමාත්‍ය වැන්ග් යී මෙහිදී සදහන් කළේය.
ඇෆ්ගනිස්තානය සතුව පැවති විදේශ සංචිත සහ වත්කම් මුදාහැරීම ඇමරිකාව ඇතුළු රටවල් ගණනාවක් විසින් ප්‍රතික්ෂේප කර ඇති අතර ඒ හේතුවෙන් මේ වන විට එරට තුළ දැවැන්ත ආර්ථික අර්බුදයක් මතුව තිබේ.
