කෙටිකතාවක් ලිවීම නිසා අත්තනෝමතික ලෙස සිරගත කිරීමට එරෙහිව ලේඛක ශක්තික සත්කුමාර විසින් ගොනුකර ඇති මූලික අයිතිවාසිකම් පෙත්සම ලබන ඔක්තෝබර් 26 දින දක්වා කල් ගියේය.
ඒ, නීතිපති දෙපාර්තමේන්තුව විසින් ඊට සූදානම් වීම සහ ලියකියවිලි සකස් කිරීම සඳහා අද (15) කරන ලද ඉල්ලීමක් නිසා ය.
මේ මූලික අයිතිවාසිකම් පෙත්සමේ වගඋත්තරකරුවන් ලෙස නීතිපති, පොලිස්පති සහ පොල්ගහවෙල පොලිස් ස්ථානයේ ස්ථානාධිපතිවරයා නම් කර ඇත.
ඔහු ලියූ අර්ධ නම් කෙටිකතාව පදනම් කරගෙන පොල්ගහවෙල ප්රදේශය කේන්ද්ර කරගෙන ක්රියාත්මක සංවිධානයක් විසින් කරන ලද පැමිණිල්ලකට අනුව, 2019 අප්රේල් 01 දා ශක්තික සත්කුමාර අත්අඩංගුවට ගන්නා ලදි.
ඔහුට එරෙහිව සිවිල් සහ දේශපාලන අයිතිවාසිකම් පිළිබඳ සම්මුතිය පනත යටතේ චෝදනා ගොනුකරන ලද අතර, එම නිසා ඔහුට මහේස්ත්රාත් අධිකරණයෙන් ඇප ලබාගැනීමට තිබූ අවස්ථාව ද අහිමි විය.
මාස හතරක් රක්ෂිත බන්ධනාගාරගත කර සිටි ඔහුට කුරුණෑගල මහාධිකරණයෙන් 2019 අගෝස්තු 05 දා ඇප ලැබිණි.
2021 ජනවාරි 25දා නීතිපතිවරයා විසින් ඉදිරිපත් කරන ලද වාර්තාවක් පදනම් කරගෙන, ශක්තික සත්කුමාර අදාළ චෝදනාවලින් නිදහස් කිරීමට පොල්ගහවෙල මහේස්ත්රාත් අධිකරණය තීන්දු කළේය.
ජනාධිපති නීතිඥ සාලිය පීරිස් මේ මූලික අයිතිවාසිකම් පෙත්සමේ පැමිණිලිකාර පාර්ශ්වය වෙනුවෙන් පෙනී සිටින අතර, ඔහු නියෝජනය කරමින් අද නීතිඥවරුන් වන පුලස්ති හේවාමාන්න, සංජීව කළුආරච්චි සහ සංජය විල්සන් ජයසේකර ශ්රේෂ්ඨාධිකරණය හමුවේ පෙනී සිටියහ.