වතුපිටිවල රෝහල සඳහා ශ්‍රී ලංකා පොදුජන පෙරමුණ විසින් ඉදිකල තාවකාලික කොවිඩ් වාට්ටුව එම රෝහල වෙත භාරදීම සදහා ඊයේ (12) උත්සවයක් පවත්වා තිබෙනවා.
එය සිදුකර ඇත්තේ ප්‍රදේශයේ අමාත්‍යවරයා වන සංචාරක අමාත්‍ය ප්‍රසන්න රණතුංග අමාත්‍යවරයාගේ ප්‍රධානත්වයෙන්.
මෙම අවස්ථාවට පාර්ලිමේන්තු මන්ත්‍රී උපුල් මහේන්ද්‍ර රාජපක්ෂ මහතා සහ සහන් ප්‍රදීප් විතාන යන මහත්වරුන් ද එක්වුණා.
ප්‍රසන්න රණතුංග මහතා සදහන් කරන්නේ අදාළ රෝහල ඉදිකිරීම සඳහා මූලිකත්වය ගත්තේ ශ්‍රී ලංකා පොදුජන පෙරමුණ බවත් එම පක්ෂයේ නිර්මාතෘ බැසිල් රාජපක්ෂ මහතාගේ උපදෙස් අනුව එය ක්‍රියාත්මක කෙරුණු බවත්ය.
මෙම උත්සව අවස්ථාවේදී පුද්ගල දුරස්ථභාවය පවත්වානොගෙන කටයුතු කරන ආකාරයද අවස්ථා කිහිපයදීම දක්නට ලැබෙනවා.
කෙසේ වෙතත් සෞඛ්‍ය මාර්ගෝපදේශවලට අනුව සෞඛ්‍ය සේවා අධ්‍යක්ෂ ජනරාල්වරයා සියලුම උත්සව පැවැත්වීම තහනම් කර තිබෙන පරිසරයකදී ප්‍රසන්න රණතුංග අමාත්‍යවරයා මෙම උත්සවය සංවිධානය කර තිබීම විශේෂත්වයක් වනවා.
