අලුත් අවුරුදු උත්සව ආදී දෑ සංවිධානය කිරීමේදී, ඒවා අවභාවිත නොකිරීමට දේශපාලඥයින් වග බලා ගත යුතු බව මැතිවරණ කොමසාරිස් ජනරාල් සමන් ශ්‍රී රත්නායක මහතා පවසනවා.
පෞද්ගලික රූපවාහිනී නාලිකාවක සාකච්ඡාවකට සහභාගි වෙමින් ඔහු පවසා සිටියේ සංස්කෘතික, ආගමික සහ ජාත්‍යන්තර වශයෙන් වටිනාකමක් සහිත සැමරුම් පටු දේශපාලන අරමුණු වෙනුවෙන් භාවිත නොකරන බවට දේශපාලන පක්ෂ සහ ස්වාධීන කණ්ඩායම්වල බලධාරීන් වග බලා ගත යුතු බවයි.
සංස්කෘතික වටිනාකමක් සහිත අවුරුදු උත්සව වැනි දෑට ආධාර කිරීමට ඕනෑම අයෙකුට හැකියාව පැවතුණත් එවැනි උත්සව මඟින් තමාව ප්‍රවර්ධනය කිරීමට උත්සාහ කරන අපේක්ෂකයින්ට ඡන්දය ලබා දීමේදී ජනතාවද සැලකිලිමත් විය යුතු බව සමන් ශ්‍රී රත්නායක මහතා තවදුරටත් සඳහන් කළා.
“අනවශ්‍ය දේශපාලන ප්‍රචාරයක් නොදී මේවා සංවිධාන කරන්න ඕන, පැහැදිලිව මේ අවුරුදු උත්සව සංවිධානය කරන අය බබාලත් නෙමෙයි…කම්කරු දිනය එනවා, සිංහල හින්දු අලුත් අවුරුද්ද එනව ඊළඟට ආගමික උත්සවයක් එනවා , මේවා පටු දේශපාලන අරමුණු වෙනුවෙන් භාවිත නොකරන්න දේශපාලන පක්ෂ සහ ස්වාධීන කණ්ඩායම්වල බලධාරීන් තේරුම් ගත යුතුයි.”
