ධුරයෙන් සමු ගැනීමට සූදානමින් සිටින ඇමෙරිකන් ජනාධිපති ජෝ බයිඩන්, සිය පුතු හන්ටර් බයිඩන්ට ජනපති සමාව ලබා දී තිබෙනවා.
හන්ටර් බයිඩන්ට බරපතල චෝදනා දෙකක් එල්ල වී ඇති අතර, අධිකරණය හමුවේ එම චෝදනා දෙකටම ඔහු වරදකරු වී සිට තිබුණා.
කෙසේවෙතත් පුතු හන්ටර්ට ජනාධිපති සමාව දී ඇත්තේ, ඔහුට දඬුවම් නියම කිරීමට සූදානම් වී ඇති අවස්ථාවකයි.
නීතීඥවරයකු මෙන්ම ව්‍යාපාරිකයකු ද වන 54 වියේ පසුවන හන්ටර් බයිඩන් බදු වංචා සිද්ධියක් සම්බන්ධයෙන් වරදකරු වූ අතර, ඊට අමතරව ඔහු මත්ද්‍රව්‍යවලට ඇබ්බැහි වී සිටි කාලය තුළ ගිනි අවියක් මිල දී ගෙන එය සන්තකයේ තබා ගැනීම යන වරදට එරෙහිව දඬුවම් නියමව සිටියා.
ඒ, අනුව එම වරද දෙකට ජනාධිපති සමාව ලබාදුන් ජෝ බයිඩන් පවසා සිටියේ තම පුතාට අසාධාරණ අයුරින් චෝදනා එල්ල වූ බවත්, එම චෝදනා හමුවේ ඔහු හුදෙකලා වීම සැලකිල්ලට ගනිමින් ඔහුට සමාවදීමට තීරණය කළ බවයි.
කෙසේ වෙතත් ජෝ බයිඩන් සිය බලතල භාවිතය කරමින් සිදුකළ මෙම ක්‍රියාව කිසිසේත් අනුමත කළ නොහැකි බවයි ප්‍රතිවාදී රිපබ්ලිකන්වරු චෝදනා කර සිටියේ.
මේ අතර මෙම නිල සමාවදීම නව ජනාධිපති ලෙස තේරී පත් වූ ඩොනල්ඩ් ට්‍රම්ප්ට හෝ අවලංගු කළ නොහැකි බවයි වාර්තා වන්නේ.
