නුවරඑළිය මීපිළිමාන ප්‍රදේශයේ නිවසක් ආසන්නයේ පිරිමි පුද්ගලයෙකු තියුණු ආයුධයකින් අමානුෂික ලෙස කපා කොටා ඝාතනය කර තිබෙනවා.
මෙසේ ඝාතනයට ලක්ව ඇත්තේ මීපිලිමාන පිහිටි නිවසක සේවය කළ කොටහේන ප්‍රදේශයේ පදිංචි 56 හැවිරිදි සුන්දරලිංගම් නැමති පුද්ගලයෙක්.
පොලීසිය පවසන්නේ නාඳුනන කණ්ඩායමක් විසින් අද (09) පෙරවරු 05.30 ත් 06ත් අතර කාලය තුළ සැලසුම් සහගත ලෙස මෙම ඝාතනය සිදු කර ඇති බවයි.
පහරදීම සිදුවන විට නිවස තුළ මියගිය පුද්ගලයාට අමතරව නිවසේ හිමිකාරිනියද රැඳී සිට තිබෙනවා.
පහරදීමෙන් අනතුරුව ඇයද තුවාල ලබා නිවසේ ජනේලයකින් පැන ගොස් අසල්වැසියන්ගේ සහයෝගය ඇතිව නුවරඑළිය දිස්ත්‍රික් මහ රෝහලට ඇතුළත් වී ඇති අතර ඇය මේ වන විට නුවරඑළිය දිස්ත්‍රික් මහ රෝහලේ හදිසි ප්‍රතිකාර ඒකකයේ ප්‍රතිකාර ලබන බව වාර්තා වෙනවා.
පොලීසිය සැක කරන්නේ කාලයක් තිස්සේ පැවති ඉඩම් ආරවුලක් පදනම් කරගෙන මෙම පහරදීම හා මිනීමැරුම සිදුකර ඇති බවයි.
පහර දුන් පුද්ගලයන් සොයා ගැනීමට අපහසු වන අන්දමින් නිවස වටා භූමිතෙල් සහ මිරිස් කුඩු හලා ගොස් ඇති අතර අදාළ පිරිස විසින් නිවසේ ඉදිරිපස ජනෙල් දොරවල්වලට පහර දී ඒවා ද විනාශ කර නිවස තුළ තිබූ ඇඳක්ද ගිනි තබා තිබෙනවා.
නුවරඑළිය පොලිසියේ අපරාධ විමර්ශන අංශය සිදු කළ මූලික පරීක්ෂණවලින් අනාවරණය වී ඇත්තේ මෙම සැකකාර කණ්ඩායම ඝාතනයෙන් පසුව එම ස්ථානයෙන් පලා ගොස් ඇති බවයි.
දීර්ඝ කාලයක් පුරාවට අදාළ ඉඩමේ මුල් අයිතිකරුගෙන් නීති විරෝධී වශයෙන් එහි සේවය කළ රියදුරෙකු විසින් ඉඩමේ අයිතිය ලබා ගැනීම සම්බන්ධව ඇතිවුණු ගැටලුකාරි තත්ත්වයන් කිහිපයක් පිළිබඳව පැමිණිලි කිහිපයක්ම නුවරඑළිය පොලිසිය වෙත ලැබී ඇති බව පොලිසිය පවසනවා.
