දීර්ඝකාලීන ජනන ව්‍යාප්ති සැලැස්ම (LTGEP) යටතේ බැටරි බලශක්ති ගබඩා පද්ධති (BESS) ධාරිතාවන් සංවර්ධනය කිරීම සඳහා කැබිනට් අනුමැතිය හිමිව තිබෙනවා.
වසර 2030 වන විට මෙරට විදුලි අවශ්‍යතාවෙන් 70% ක් පුනර්ජනනීය බලශක්ති සම්පත්වලින් සපුරා ගැනීමේ ඉලක්කය සාක්ෂාත් කර ගැනීම සඳහා 2024-2030 කාල සීමාව තුළ ක්‍රියාත්මක කිරීමට අපේක්ෂිත ව්‍යාපෘති මඟින් ජනනය කරනු ලබන පුනර්ජනනීය බලශක්ති ධාරිතාවන් ජාතික විදුලි බල පද්ධතියට එක් කර ගැනීම අත්‍යවශ්‍යව පවතින බව රජය පවසනවා.
ඒ අනුව,රට තුළ පවතින සුළං සහ සූර්යබල විභවයන් සංවර්ධනය කිරීම සඳහා රජය විශේෂ අවධානයක් යොමු කර ඇති අතර, විචල්‍ය ස්වභාවයෙන් යුත් එම බල ශක්තිය විදුලි බල පද්ධතියට එක් කිරීම ක්‍රමයෙන් වැඩි වන විට පද්ධතියේ විශ්වසනීයත්වය පවත්වාගෙන යාම සඳහා වඩාත් නම්‍යශීලී විදුලි බල පද්ධතියක් පැවතීමේ අවශ්‍යතාවයක් පවතිනවා.
රජය පවසන්නේ ඒ සඳහා යෝග්‍ය ක්‍රමවේදයක් වශයෙන් දීර්ඝකාලීන ජනන සැලැස්ම යටතේ බැටරි බලශක්ති ගබඩා පද්ධති හඳුනාගෙන ඇති බවයි.
ඒ අනුව, පුද්ගලික ආයෝජන හෝ රාජ්‍ය-පෞද්ගලික හවුල්කාරිත්වයන් යටතේ හෝ ජාතික විදුලිබල පද්ධතියට සම්බන්ධ කිරීම සඳහා හඳුනාගනු ලබන බැටරි ධාරිතාවන් සංවර්ධනය කිරීම පිණිස විදුලි බල හා බලශක්ති අමාත්‍යවරයා ඉදිරිපත් කළ යෝජනාව අමාත්‍ය මණ්ඩලය විසින් අනුමත කර තිබෙනවා.
