විදුහල්පති සේවා හා ගුරු සේවා වැටුප් විෂමතා ගැටලුව සම්බන්ධයෙන් එළඹෙන සතිය තුළදී අදාළ වෘත්තීය සමිති වෙන් වෙනව මුණගැසී සාකච්ඡා කිරීමට තීරණය කර ඇති බව අමාත්‍ය අනුකමිටුව පවසනවා.
ගුරු විදුහල්පති වැටුප් විෂමතා අධ්‍යයනය කර එම ගැටලු විසඳීම සඳහා යෝජනා ඉදිරිපත් කිරීමට පත්කළ කැබිනට් අනුකමිටුව ඊයේ (12) පෙරවරුවේ අමාත්‍ය විමල් වීරවංශ මහතාගේ කොළඹ පිහිටි නිල නිවසේදී රැස්වී සාකච්ඡා සිදුකර තිබුණා.
ජනාධිපති ගෝඨාභය රාජපක්ෂ මහතාගේ සෞභාග්‍යයේ දැක්ම ප්‍රතිපත්ති ප්‍රකාශයෙන් පිළිගෙන ඇති ආකාරයට විදුහල්පතිවරුන් හා ගුරුවරුන් ශ්‍රී ලංකාවේ රාජ්‍ය සේවා ධුරාවලිය තුළ ගෞරවනීය වෘත්තිකයන් බවට පත්කිරීම පෙරදැරි කරගෙන සාකච්ඡා පැවැත්වෙන බවද අදාළ අනුකමිටුව නිවේදනය කරනවා.
එම අනුකමිටුව පෙන්වා දෙන්නේ මෙතෙක් ඒ සම්බන්ධව ගෙන ඇති පියවරයන් පිළිබඳව අධ්‍යාපන අමාත්‍යාංශයෙන් තොරතුරු ලබාගත් බවයි.
අමාත්‍ය විමල් වීරවංශ මහතා, අමාත්‍ය ඩලස් අලහප්පෙරුම මහතා, අමාත්‍ය මහින්ද අමරවීර මහතා සහ අමාත්‍ය ප්‍රසන්න රණතුංග මහතා මෙම කැබිනට් අනුකමිටුවේ සාමාජිකයින් ලෙස පත්කර තිබෙනවා.
මේ අතර ගුරු විදුහල්පති වැටුප් ගැටලුවට විසඳුම් ඉල්ලා ක්ෂේත්‍ර රැසක වෘත්තීය සමිති නායකයින් එක්ව ඊයේ (12) කොළඔ නිදහස් චතුරශ්‍රය ඉදිරිපිට සත්‍යග්‍රහයක් ආරම්භ කළා.
ගුරු වෘත්තිය සමිති පවසන්නේ මෙම සත්‍යග්‍රහය ඇතුළු ගුරු – විදුහල්පති සටනට වෘත්තීය සමිති 50 ක සහය ලැබෙන බවයි.
