පාස්කු ඉරිදා බෝම්බ ප්‍රහාරය වැලැක්වීමට නොහැකිවීම සම්බන්ධයෙන් හිටපු ජනාධිපති මෛත්‍රීපාල සිරිසේන මහතා සිදුකළ සමාව අයැදීම ශ්‍රී ලංකාවේ කතෝලික සභාව පිළිනොගන්නා බව කොළඹ අගරදගුරු මැදුරේ ජාතික සන්නිවේදන අධ්‍යක්ෂ ජූඩ් ක්‍රිශාන්ත ප්‍රනාන්දු පියතුමා පවසනවා.
ජූඩ් ප්‍රනාන්දු පියතුමා මාධ්‍ය වෙත අදහස් දක්වමින් කියා සිටියේ ප්‍රහාරය වැළැක්වීමට අපොහොසත් වීම නිසා හිටපු ජනාධිපතිවරයාට සිරගත වීමට සිදුවන බවයි.
“හිටපු ජනාධිපති සිරිසේන කියනවා යුද්ධය පැවති කාලයේ රට පුරා බෝම්බ පිපිරීම් සිදු වූ බවත්, එම ත්‍රස්ත ප්‍රහාර පිළිබඳව කිසිදු පරීක්ෂණයක් සිදු කර නොමැති බවත්. ඔහු මතක තබා ගත යුතුයි පාස්කු ඉරිදා බෝම්බ ප්‍රහාරය සම්බන්ධයෙන් පූර්ව අනතුරු ඇඟවීම් නිකුත් කර ඇති බව. ප්‍රහාර එල්ල වන ස්ථානත් දැන සිටියා. ඒ නිසා ජනාධිපති සිරිසේනට වගකීමෙන් ගැලවෙන්න බැහැ” ප්‍රනාන්දු පියතුමා පැවසීය.
“ශ්‍රී ලංකාවේ කතෝලිකයන් ඔහුට සමාව දී ඔහුව පිළිගන්නා බවත් හිටපු ජනාධිපති සිරිසේන කියනවා. ඒ නිසා අපි ඔහුගෙන් ඉල්ලා සිටින්නේ කොච්චිකඩේ සහ මීගමුවේ කතෝලික ජනතාව අතරට ගොස් ඔවුන් ඔහුව පිළිගන්නා බව ඔප්පු කරන ලෙසයි. එමෙන්ම දෙවියන් වෙනුවෙන් සමාව ඉල්ලා සිටින බවත් ඔහු කියලා තියෙනවා. එවැනි ප්‍රකාශයක් කිරීමට ඔහු දෙවියන්ගේ නියෝජිතයෙක්ද? ” ඔහු වැඩිදුරටත් පැවසීය.
