සිලෝන් බිස්කට් සමාගම විසින් නිෂ්පාදනය කෙරෙන ටියාරා කේක් නිෂ්පාදනයේදී ස්වභාවික බිත්තර භාවිතා නොකර ඒ සඳහා වෙනත් ආදේශකයන් භාවිතා කරන බවට වන කටකතාවක් සමාජ මාධ්‍ය ඔස්සේ පැතිරයන බවට සිලෝන් බිස්කට් සමාගම නිවේදනය කරනවා.
එම සමාගම පවසන්නේ ඔවුන්ගේ සියලුම නිෂ්පාදනයන් මෙන්ම ටියාරා කේක් නිෂ්පාදනයටත් ස්වභාවික මෙන්ම නැවුම් බිත්තර පමණක් භාවිතා කරන බවයි.
තවද එම නිෂ්පාදනයන් සඳහා කිසිදු රසායනික ආදේශකයක් භාවිතා නොකරන බවට තම සමාගම වගකීමෙන් යුතුව පාරිභෝගික ජනතාවට දැනුම් දෙන බවද අදාල නිවේදනයේ සඳහන්.
එමෙන්ම මෙවැනි අසත්‍ය ප්‍රචාරයන් ගෙනයන පුද්ගලයාට හෝ කණ්ඩායමට එරෙහිව නීතිමය ක්‍රියාමාර්ග ගැනීමටද කටයුතු කරමින් සිටින බවද සිලෝන් බිස්කට් සමාගම නිවේදනය කරනවා.
කෙසේ වෙතත් අදාල නිවේදනයට ප්‍රතිචාර දක්වමින් සමාජ මාධ්‍ය ඔස්සේ පාරිභෝගික ජනතාව විමසා ඇත්තේ ස්වභාවික බිත්තර යොදාගන්නා ආහාරයක් මාස 6 ක පමණ කාලයක් කල්තබාගන්නේ කෙසේද යන්නයි.
