’43 කණ්ඩායම’ට වෙනම යන්න චම්පික අවසර පතයි

සමගි ජනබලවේග සන්ධානය යටතේ වෙනම බලවේගයක් හැටියට ක්‍රියාත්මකවීමට අනුමැතිය දෙන්නැයි පාර්ලිමේන්තු මන්ත්‍රී චම්පික රණවක ඇතුළු හිටපු හෙළඋරුම කණ්ඩායම එහි නායකත්වයෙන් ඉල්ලීමක් කර ඇත.
ඒ අනුව අදාළ ඉල්ලීම සමගි ජනබලවේගයේ මහලේකම් රංජිත් මද්දුමබණ්ඩාර මහතා මගින් එහි කෘත්‍යාධිකාරී මණ්ඩලයට ඉදිරිපත් කර ඇත.
කෙසේ වෙතත් අදාළ ඉල්ලීමට මේ වනතෙක් සමගි ජනබලවේග කෘත්‍යාධිකාරී මණ්ඩල අනුමැතිය ලැබී නැතැයි කෘත්‍යාධිකාරී මණ්ඩල සාමාජිකයෙක් ‘News 19ට’ පැවැසීය.
ඊට හේතුව චම්පික රණවක කණ්ඩායම වෙනම බලවේගයක් හැටියට කටයුතු කිරීමට ඇතැම් කෘත්‍යාධිකාරී මණ්ඩල සාමාජිකයන් විරුද්ධවීම යැයි ද ඔහු කීය.
මේ සම්බන්ධයෙන් කළ විමසීමේදී හිටපු හෙළ උරුම කණ්ඩායමේ සාමාජිකයකු පැවැසුවේ පෙබරවාරි මාසය වනවිට තමන් 43 කණ්ඩායම නමින් වෙනම බලවේගයක් නිල වශයෙන් එළිදක්වන බවය.