තමාට එරෙහිව සමාජ මාධ්‍යයේ Youtube නාලිකාවක් හරහා එල්ල කර ඇති චෝදනාවලට දේශීය හා අන්තර්ජාතික අධිකරණ ක්‍රියාමාර්ගයක් ඔස්සේ පිළිතුරු සැපයීමට කටයුතු කරන බව රෝසි සේනානායක මහත්මිය පවසනවා.
දෙසතියකට පෙර ඇමෙරිකාවේ ලාස්වේගාස් හි පැවැති ලෝක විවාහක රූ රැජින තරඟාවලිය සම්බන්ධයෙන් ඊට මෙරටින් සහභාගී වූ පුෂ්පිකාද සිල්වා මහත්මිය Youtube නාලිකාවක සම්මුඛ සාකච්ඡාවක් හරහා රෝසි සේනානයක මහත්මියට දැඩිව චෝදනා එල්ල කර තිබුණා.
තරඟයේ අවසන් විනිශ්චයද යම් කිසි කෙනෙකුගේ මැදිහත්වීමකින් වෙනස් කර ඇතැයි පුෂ්පිකා ද සිල්වා මහත්මිය එහිදී වරින් වර සදහන් කළා.
ඇමෙරිකානු සමාගමක් වන මිසිස් වර්ල්ඩ් ආයතනය, එරටේම සමාගමක් වන Youtube (Google) සමාගමට ඇමෙරිකානු නීතිය යටතේ මේ සම්බන්ධයෙන් පැමිණිලි කිරීම සඳහා මේ වනවිටත් පියවර ගනිමින් සිටින බව සේනානායක මහත්මිය News19 කළ විමසීමක දී පවසා සිටියා.
මිසිස් වර්ල්ඩ් සමාගම මෙම Youtube නාලිකාවට එරෙහිව සිංගප්පූරුවේ ජාත්‍යන්තර වාණිජ අධිකරණයේ හමුවට යාමේ හැකියාව සොයා බලමින් සිටින බවද පැවසෙනවා.
මීට අමතරව තමා ද, සිවිල් අපහාස නීතිය යටතේ එම Youtube නාලිකාවටත්, එහි හිමිකරුට සහ එම සම්මුඛ සාකච්ඡාවට සහභාගී වූ තැනැත්තියටත් එරෙහිව නීතිමය පියවර ගැනීම සඳහා නීතිඥයන් යොමුකර ඇතැයි ද සේනානායක මහත්මිය පවසනවා.
