මාධ්‍යවේදී චමුදිත සමරවික්‍රම මහතාට හෙට (18) දින අධිකරණය හමුවේ පෙනී සිටින ලෙස දන්වමින් සිතාසි නිකුත් කර තිබෙනවා.
ඒ හිටපු ජ්‍යෙෂ්ඨ පොලිස් අධිකාරී ශානි අබේසේකර මහතාට අපහාස වන ලෙස හිරු ටීවී නාලිකාවේ විකාශය වන පත්තරේ විස්තරේ වැඩසටහන මෙහෙයවූ බවට චෝදනා කරමින් ශානි අබේසේකර මහතා ගොනු කරන ලද නඩුවකට අදාලවයි.
එම වැඩසටහනෙන් විකාශය කළ පරිදි ක්‍රියාවක් තමන් විසින් කිසිදු අවස්ථාවක සිදුකර නොමැති බවත් සියලු රාජකාරී කටයුතු නිසි ක්‍රියාපටිපාටිය තුළ මෙහෙයවා ඇති අතර, තනතුර අවභාවිත කරමින් කිසිදු පුද්ගලයෙකුට එරෙහිව ද්වේශසහගතව නඩු පවරා නොමැති බවත් අබේසේකර මහතා සිය පැමිණිල්ල මඟින් පෙන්වා දෙනවා.
ඒ අනුව තමන් සම්බන්ධයෙන් ද්වේශ සහගතව අපහාසාත්මකව චමුදිත සමරවික්‍රම මහතා සහ හිරු මාධ්‍ය ආයතනය අයත් ඒෂියා බ්‍රෝඩ්කාස්ටින් කෝපරේෂන් පුද්ගලික සමාගම කටයුතු කර ඇති බැවින් තමාට සිදු වූ අලාභය වෙනුවෙන් ශානි අබේසේකර මහතා රුපියල් මිලියන 500 ක වන්දියක් ඉල්ලා තිබෙනවා.
