බිඳ වැටුණු චීන ඇමෙරිකා සබඳතා යළි ගොඩනැන්විය යුතු යැයි චීන විදේශ කටයුතු ඇමැති වෑන් ඊ ඔන් මහතා චීන ඇමෙරිකා ව්‍යාපාරික කවුන්සිලය හමුවේ අද(7) ප්‍රකාශ කර ඇත.
එක්සත් ජාතින්ගේ ආරක්ෂක කවුන්සිලයේ නිත්‍ය සාමාජික රාජ්‍ය දෙකක් හැටියටත් විශාලතම ආර්ථිකය සහිත රාජ්‍ය දෙකක් හැටියටත් ලෝවැසියන්ගේ සාමය සහ සෞභාග්‍ය වෙනුවෙන් ද්විපාර්ශ්වික සහයෝගය සඳහා මෙසේ කැප විය යුතු යැයි චීන විදේශ ඇමැති වෑන් ඊ ඔන් මහතා පවසා ඇතැයි ෂින්හුවා ප්‍රවෘත්ති සේවය සඳහන් කරයි.
චීන ඇමෙරිකා ව්‍යාපාරික කවුන්සිලයේ අධ්‍යක්ෂ මණ්ඩලය අන්තර්ජාලය ඔස්සේ බීජිං සිට ආමන්ත්‍රණය කරමින් චීන විදේශ ඇමැතිවරයා ද්විපාර්ශ්වික සබඳතා ශක්තිමත් කිරීමට යෝජනා පහක් ද ඉදිරිපත් කර ඇත.
එහිදී ඇමෙරිකාව සියල්ලට ප්‍රථමයෙන් උපායමාර්ගිකව නිවැරැදිව චීනය හඳුනාගත යුතු යැයි ද එමගින් ඇමෙරිකා චීන සබඳතා තාර්කික මාවතකට අවතීර්ණ කරගැනීමට හැකිවනු ඇතැයි ද වෑන් ඊ ඔන් මහතා පවසා ඇත.
දෙවැනුව ඒ සඳහා අවශ්‍ය සියලු ආකාරයේ සන්නිවේදනයන් සිදු විය යුතු යැයි කී හෙතෙම එහිදී උපායමාර්ගික වශයෙන් ද ව්‍යාපාරික වශයෙන් ද ඊට සහාය හිමි විය යුතු යැයි ද අවධාරණය කර තිබේ.
චීන විදේශ ඇමැතිවරයාගේ අදහස වන්නේ කොවිඞ් 19 වසංගතය මර්දනයට අදාළ ක්‍රියාකාරකම් දේශගුණික විපර්යාස ආමන්ත්‍රණය ඇතු`ඵ විෂය මගින් ඊට අදාළ අන්‍යොන්‍ය ප්‍රතිපලදායී සහයෝගයට ප්‍රවේශය ලබාගත හැකි බවයි.
මෙම කටයුතුවලදී ඓතිහාසික සංස්කෘතික උරුමයන්ගේ පාර්ශ්වීය වෙනස්කම් දරාගැනීම අත්‍යවශ්‍ය යැයි ද ඒ සඳහා රාජ්‍ය දෙකේම ව්‍යවස්ථාදායකයටත් ව්‍යාපාරිකයන්ටත් තරුණ ප්‍රජාවටත් කළ හැකි විශාල කාර්යභාරයක් ඇතැයි ද වෑන් ඊ ඔන් මහතා වැඩිදුරටත් පවසා ඇත.
මේ වනවිට චීන විදේශ ඇමැතිවරයාගේ දේශපාලන ඇරියුම සම්බන්ධයෙන් ලෝක මට්ටමෙන් විශාල අවධානයක් යොමුව තිබේ.
