චීනය තමන්ගේ විශේෂ සඳ මෙහෙයුමක් රැගත් යානයක් අභ්‍යවකාශගත කරන්නට සූදානමින් ඉන්නවා. මෙම යානය නොවැම්බර් මාසයේ අග අභ්‍යවකාශගත කරනු ඇති.
චැන්ග්’ඉ-5 නමින් හඳුන්වන එම මෙහෙයුම 2017 දී කරන්නට සැලසුම් කර සිටියා. එහෙත් රොකට්ටුවේ අඩුපාඩුවක් නිසා එය ප්‍රමාද වී තිබුණා.
මෙම මෙහෙයුම සංකීර්ණ මෙහෙයුමක්ලු. මෙහෙයුමෙන් යන එක් යානයක් සඳ වටා අභ්‍යවකාශගත කරනු ඇති. තවත් යානයක් සඳේ ගිනිකඳු සහිත පෙදෙසකට ගොඩබසිනු ඇති. එමගින් සඳේ පාෂාණ එකතු කරනු ඇති. ඉන්පසු නැවත සඳ වටා ගමන් කරන යානයට එකතු වී, එය පෘථිවිය බලා පැමිණෙනු ඇති.
විද්‍යාඥයන් පවසන්නේ සාමාන්‍යයෙන් මෙවැනි මෙහෙයුමක් කිරීමට නම් මිනිසුන් ගමන් කිරීම සුදුසු බව. මෙම මෙහෙයුම අනාගතයේදී මිනිසුන් යොදා සිදුකරන මෙහෙයුමක් සඳහා පෙරහුරුවක් විය හැකි බවත් විද්‍යාඥයන් කියනවා.
ලෝන්ග් මාර්ච්-5 නම් දැවැන්ත රොකට්ටුවෙන් එය අභ්‍යවකාශගත කරන්නට සූදානම් කර තිබෙනවා. දකුණු චීනයේ හයිනන් ප්‍රාන්තයේ පිහිටි මෙම මෙහෙයුමේ ආරම්භක ස්ථානයට මෙම රොකට්ටුව උඩු අතට තබාගනිමින් ප්‍රවාහනය කර තිබුණා.
