චීනයේ ජනගහනයේ විකාශනයත් සමඟ විශ්‍රාම වැටුප් ක්‍රමවේදය යාවත්කාලීන නොවීමෙන් එරට වැඩිහිටියන් පීඩාවට පත්ව ඇති බව වාර්තා වනවා.
2022 වසරේදී මිලියන 280.04ක්ව පැවති චීනයේ වයස අවුරුදු 60 ට වැඩි ජනගහනය 2023 වසරේදී මිලියන 296.97ක් දක්වා වර්ධනය වී තිබෙන බව විදෙස් මාධ්‍ය පෙන්වා දෙනවා.
ඒ අනුව, චීනයේ මුළු ජනගහනයෙන් 21.1%ක් වයස අවුරුදු 60ට වැඩි අය බව සදහන්.
වයස්ගත ජනගහනයේ වැඩි වීමත් සමඟ ඊට සරිලන ප්‍රතිසංස්කරණ විශ්‍රාම වැටුප් ක්‍රමවේදය තුළ සිදු නොවීම තුළ ඉදිරියේදී එම වැටුප් ක්‍රම වේදය පවත්වා ගෙන යාම පවා අර්බුදකාරී වනු ඇති බවයි විදෙස් වාර්තා පෙන්වා දෙන්නේ.
දැනටමත් චීනයේ විශ්‍රාමිකයන්ට අවශ්‍ය පුළුල් ආවරණයන් හා ප්‍රතිලාභ ලැබීමේ අසමානතා දක්නට ඇති බව එම වාර්තාවල සදහන් වනවා.
චීන රජයේ ප්‍රතිපත්ති හා වැඩිහිටියන්ගේ අවශ්‍යතා අතර, සම්බන්ධීකරණයක් නොමැතිකම චීනයේ විශ්‍රාම වැටුප් ක්‍රමවේදයේ කැපී පෙනෙන දුර්වලතා ලෙස පෙනී යන බව එරට ආර්ථික විශ්ලේෂකයන් ද පෙන්වා දී තිබෙනවා.
එරට රජය ප්‍රමුඛතාව ලබා දී ඇත්තේ ආර්ථික වර්ධනයට හා ජනගහන ස්ථාවරත්වයට බවත්, වයස්ගත ජනගහනයේ සුබසාධන නොසලකා හැර ඇති බවත් ඔවුන් පවසන බවයි විදෙස් වාර්තා සදහන් කළේ.
