දැඩි ශුන්‍ය කොවිඩ් ප්‍රතිපත්තියට එරෙහිව චීනයේ ප්‍රධාන නගරවල විරෝධතාවලින් පසුව රටේ කොවිඩ් වැළැක්වීමේ සහ පාලන පියවරයන් වැඩිදියුණු කිරීමට තවදුරටත් උත්සාහ කරන ලෙස චීන උප අගමැති සන් චුන්ලාන් ඉල්ලීමක් කර ඇති බව වාර්තා වේ.
වෛරසය ව්‍යාධිජනකභාවයෙන් දුර්වල වන බැවින් පරීක්ෂණ, ප්‍රතිකාර සහ නිරෝධායන ප්‍රතිපත්ති ප්‍රශස්ත කිරීමේ වැදගත්කම මෙන්ම සමස්ත ජනගහනයටම ප්‍රතිශක්තිකරණය ලබා දීමේ වැදගත්කම ඔහු අවධාරණය කර ඇති බව ද සදහන් වේ.
රට නව තත්වයකට සහ වසංගත වැළැක්වීම සහ පාලනය කිරීමේ නව කාර්යයන්වලට මුහුණ දී සිටින බව ඔහු ප්‍රකාශ කර තිබේ.
ඒ අතරම, චීන බලධාරීන් සෑම විටම ජනතාවගේ සෞඛ්‍යය සහ ආරක්ෂාවට මුල් තැන දී ඇති බවත්, ස්ථාවර උපාය මාර්ගයක් සහ නම්‍යශීලී ක්‍රියාමාර්ගයක් සමඟ වසංගතයට මුහුණ දුන් බවත් සන් සඳහන් කර ඇත.
වසංගතයේ ආරම්භයේ සිටම චීනය කොවිඩ් රෝගීන් කෙරෙහි ශුන්‍ය ඉවසීමේ ප්‍රතිපත්තියක් අනුගමනය කළ අතර චීනය වසංගත රෝග පාලනය ලෝකයේ දැඩිම ක්‍රියාමාර්ග අනුගමනය කල රට ලෙසට ද සටහන් වී තිබේ.
මානව හිමිකම් සංවිධානවලට අනුව, සති අන්තයේ දී, චීනයේ විශාලතම නගරය සහ මූල්‍ය මධ්‍යස්ථානය වන ෂැංහයි හි දහස් ගණන් ජනයා, රජයේ දැඩි කොවිඩ් ක්‍රියාමාර්ගවලට ප්‍රසිද්ධියේ විරෝධය දැක්වීමට සහ චීන කොමියුනිස්ට් පක්ෂයේ අත්තනෝමතික පාලනය හෙළා දැකීමට පටන් ගත්හ.
