පසුගියදා විවෘත කෙරුණු මධ්‍යම අධිවේගී මාර්ගයේ මීරිගම සිට කුරුණෑගල දක්වා වන කොටසේ මේ වන විටත් විශාල තදබදයක් ඇතිව ඇති බව අප වාර්තාකරුවන් සදහන් කරනවා.
ඒ එම මාර්ගය දැක බලා ගැනීම සදහා මෙන්ම විනෝදය පිණිස එහි ගමන් ගන්නා පිරිස අධිකවීම හේතුවෙන් බවයි වාර්තා වන්නේ.
රථවාහන ප්‍රමාණය වැඩිවීම නිසා පිටවීමේ කවුළු අසල දැඩි වාහන තදබදයක් ඇතිව තිබෙනවා.
මේ අතර මධ්‍යම අධිවේගී මාර්ගයේ මීරිගම සිට කුරුණෑගල දක්වා වූ කොටසේ නියමිත වේග සීමා සහ නියමිත දුර ප්‍රමාණ පවත්වාගෙන යමින් ධාවනයේ යෙදෙන්නැයි අධිවේගී මාර්ග මෙහෙයුම් නඩත්තු හා කළමනාකරණ අංශයේ වැඩබලන අධ්‍යක්ෂ නිහාල් ලොඩ්වික් මහතා සියලු රියදුරන්ගෙන් ඉල්ලා සිටිනවා.
ඔහු සදහන් කරන්නේ නව අධිවේගී මාර්ග කොටසේ සමහරුන් විනෝදයට අධික වේගයෙන් රිය ධාවනය කරන බවට තොරතුරු ලැබී ඇති බැවින් මෙම ඉල්ලීම සිදුකරන බවයි.
මේ අතර මධ්‍යම අධිවේගී මාර්ගය විවෘත කළ පසුව මහාමාර්ග අමාත්‍ය ජොන්ස්ටන් ප්‍රනාන්දු මහතා විසින් ඊයේ (16) දහවල් 12 දක්වා නොමිලයේ ගමන් කිරීමට මහජනතාවට අවස්ථාව ලබාදී තිබුණා.
