පසුගිය නොවැම්බර් 27 වෙනිදා හෝ ඊට ආසන්න දිනයකදී ජනාධිපතිවරයා විසින් තමන්ව කැඳවා මන්නාරම සුළං විදුලි බලාගාරය ඉන්දියාවේ ප්‍රකට සමාගමක් වන ආදානි සමාගමට ලබාදෙන්නැයි පැවසූ බව ලංකා විදුලිබල මණ්ඩලයේ හිටපු සභාපති එම්. එම්. සී ෆර්ඩිනැන්ඩු මහතා විසින් කෝප් කමිටුවට සිදු කළ ප්‍රකාශය හේතුවෙන් සිය තනතුරෙන් ඉල්ලා අස්වීමට ඔහුට සිදුවිය.
කෙසේ නමුත් අද (23) දිනයේත් එම්. එම්. සී ෆර්ඩිනැන්ඩු මහතා කෝප් කමිටුව හමුවට කැඳවනු ලැබූ අතර එහිදී ඔහු විසින් සිදුකරන ලද බරපතල ආන්දෝලනාත්මක හෙළිකිරීම් හේතුවෙන් ඔහුගේ ප්‍රකාශයේ වීඩියෝ දර්ශන මාධ්‍යට නිකුත් කිරීමට නොහැකි බව කෝප් කමිටුව පවසනවා.
මෙතෙක් සිදුවූ පිළිවෙත වූයේ පාර්ලිමේන්තු පොදු ව්‍යාපාර පිළිබඳ කාරක සභා වාරයකින් පසුව ඊට අදාල වීඩියෝ දර්ශන පාර්ලිමේන්තුව විසින් මාධ්‍ය වෙත නිකුත් කිරීම වන නමුත් මෙවර එම්. එම්. සී ෆර්ඩිනැන්ඩු මහතා විසින් තමන්ට ඉල්ලා අස්වීමට සිදුවූ හේතූන් සම්බන්ධයෙන් ද, විදුලි බල මණ්ඩලයට ආණ්ඩුවෙන් ඇති බලපෑම් සම්බන්ධයෙන් සහ මෙරට විදුලි බල ක්ෂේත්‍රයට ඉන්දියාවෙන් ඇති බලපෑම් සම්බන්ධයෙන් ඇතුලු බරපතල හෙළිදරව් කිරීම් රාශියක් සිදු කළ බැවින් මෙවර එම වීඩියෝ දර්ශන මාධ්‍යයට හෙළි නොකරන බවයි කෝප් කමිටු සභාපතිවරයා පවසන්නේ.
අදාල ප්‍රකාශ වල බරපතල බව සලකා ඒ සම්බන්ධයෙන් මාධ්‍ය නිවේදනයක් සමඟ ඡායාරූප පමණක් මාධ්‍ය වෙත නිකුත් කෙරෙනු ඇති බවයි පාර්ලිමේන්තු පොදු ව්‍යාපාර පිළිබඳ කාරක සභාවේ සභාපති චරිත හේරත් මහතා පවසන්නේ.
