පුද්ගලයෙකුට වෙඩිතබා පසුව තියුණු ආයුධයකින් කපාකොටා බරපතළ තුවාල සිදුකිරීමේ සිදුවීමකට අදාළව පොලීසිය විසින් සොයමින් සිටි අඹුසැමි යුවලක් අත්අඩංගුවට ගෙන තිබෙනවා.
එම අපරාධය සිදුකර ඇති පුද්ගලයා සහ ඔහුගේ බිරිඳව ඊයේ (11) තංගල්ල කොට්ඨාස අපරාධ විමර්ශන අංශය විසින් හුංගම පොලිස් වසමේ වාඩිගල ප්‍රදේශයේදී අත්අඩංගුවට ගෙන ඇති බව වාර්තා වෙනවා.
පසුගිය 11 වනදා හම්බන්තොට ප්‍රදේශයේ දී මෝටර් රථයකින් ගමන් කරමින් සිටි පුද්ගලයෙකුට වෙඩිතබා තියුණු ආයුධයකින් කපාකොටා තුවාල සිදුකර තිබීම සම්බන්ධයෙන් මොවුන්ට චෝදනා එල්ල වී තිබුණා.
පොලීසිය පවසන්නේ අත්අඩංගුවට ගත් 29 හැවිරිදි සැකකරු සහ 23 හැවිරිදි සැකකාරිය වාඩිගල, රන්න ප්‍රදේශයේ පදිංචිකරුවන් බවයි.
සැකකරුගෙන් සිදුකළ වැඩිදුර ප්‍රශ්න කිරීම්වලදී මොවුන් හම්බන්තොට හා හුංගම පොලිස් වසමේවල ගවයින් සොරකම් කිරීමේ අපරාධ 03ක් සඳහා සම්බන්ධ බවටද අනාවරණය වී තිබෙනවා.
පොලීසිය පවසන්නේ සැකකරුට හම්බන්තොට හා වැල්ලවාය මහෙස්ත්‍රාත් අධිකරණය මඟින් වරෙන්තු 06ක්ද නිකුත් කර ඇති බවයි.
අත්අඩංගුවට ගත් අඹුසැමි යුවල ඊයේ හම්බන්තොට මහෙස්ත්‍රාත් අධිකරණය වෙත ඉදිරිපත් කිරීමෙන් අනතුරුව එළඹෙන 20 වනදා දක්වා රක්ෂිත බන්ධනාගාර ගත කිරීමට තීරණය කර තිබෙනවා.
