ඔන්මැක්ස් ඩී.ටී. පිරමීඩාකාර මූල්‍ය වංචාවට හසුවූ තැන්පත්කරුවන්ගේ සියලු පැමිණිලි ලැබීමෙන් අනතුරුව ඔවුන්ට මුදල් ලබාදීමට අදාළ වැඩපිළිවෙලක් සකස් කර ඒ පිළිබඳව කරුණු ඇතුළත් වාර්තාවක් ජූලි මස 23 වනදා අධිකරණයට ඉදිරිපත් කරන ලෙස කොළඹ ප්‍රධාන මහේස්ත්‍රාත් තනූජා ලක්මාලි ඊයේ (02) නියෝග කළා
ඒ අපරාධ පරීක්ෂණ දෙපාර්තමේන්තුවටයි.
එමෙන් ම, එළැඹෙන මැයි 30 වනදා ට පෙර එම සිද්ධියට අදාළ සියලු පැමිණිලි භාර ගන්නා ලෙස දිවයිනේ සියලුම පොලිස් ස්ථාන වෙත දැනුම් දෙන ලෙසද මහේස්ත්‍රාත්වරිය වැඩ බලන පොලිස්පතිවරයාට නියෝග කළා.
මෙම නඩුව වසර ගණනාවක් තිස්සේ විභාග වෙමින් පවතින බවත් තවදුරට ත් එලෙස සිදුවීම තුළින් තැන්පත්කරුවන්ට සාධාරණයක් ඉටු නොවන බව පෙනීයන බැවින් ඒ සම්බන්ධයෙන් නීතිපතිවරයා දැනුවත් කරන ලෙසට රජයේ ජ්‍යෙෂ්ඨ නීතිඥ ඔස්වල්ඩ් පෙරේරා කළ කරුණු දැක්වීමක් සලකා බැලීමෙන් අනතුරුව නියෝග කර සිටියා.
තවද සියලු පැමිණිලි මැයි 30 දිනට පෙර භාරගෙන අවසන් කිරීමට නියෝගයක් ලබා දෙන ලෙසට අධිකරණයෙන් එසේ නියම කෙරුණා.
මේ වන විට සිද්ධියට අදාළව පැමිණිලි 5,000ක් පමණ ලැබී ඇති බවත් සිදුකළ විමර්ශනවලට අනුව මෙම වංචාකාර පිරමීඩ මූල්‍ය ජාවාරම හරහා තැන්පත්කරුවන් සතු කෝටි 19ක පමණ මුදලක් වංචා කර ඇති බව නීතිඥවරයා සඳහන් කළා.
නීතිඥවරයා අධිකරණයට දන්වා සිටියේ වංචාකරුවන් සතු මිලියන දෙකයි දශම හයක පමණ දේපළ අධිකරණයේ නියෝග මත අත්හිටුවා ඇති බවයි.
මෙම තැන්පත්කරුවන්ගෙන් වංචාසහගතව ලබාගෙන ඇති මුදල් ඔවුන්ට නැවත ලබාදීම සඳහා කළ යුත්තේ කුමක් ද යන්න පිළිබඳව නීතිපතිවරයාට, ශ්‍රී ලංකා මහ බැංකුවට හා අපරාධ පරීක්ෂණ දෙපාර්තමේන්තුවට අවශ්‍ය නියෝගයක් ලබා දෙන ලෙස ද නීතිඥවරයා අධිකරණයෙන් ඉල්ලීමක් කළා.
මෙම සිද්ධියට අදාළව මේ වන විටත් පැමිණිලි ලැබෙමින් පවතින බවත් එම නිසා මෙම වංචාසහගත සිද්ධියේ ඇතැම් කරුණු කාරණා විමර්ශනය කිරීම පවා දැඩි ගැටලුකාරී තත්ත්වයකට පත්ව ඇති බවත් ඔහු පවසා සිටියා.
වින්දිතයන් වෙනුවෙන් නීතිඥ අචලා සෙනෙවිරත්න ද අධිකරණය හමුවේ කරුණු දැක්වූ අතර මෙම සිද්ධියට අදාළව 2019 වසරේදී මහ බැංකුවට පැමිණිලි ලැබී තිබූ නමුත් මහ බැංකුව ඒ පිළිබඳව අවධානය යොමු කළේ 2023 වසරේදී නිසා තැන්පත්කරුවන්ට අසාධාරණයක් සිදුවූ බව ද සිද්ධියෙන් පීඩාවට පත් වු ඇතැම් තැන්පත්කරුවන් සියදිවි නසාගෙන ඇති බවත් සඳහන් කළා.
සිද්ධියට අදාළ සැකකරුවන් ඊයේ අධිකරණය හමුවේ පෙනී සිටි අතර ඔවුන් වෙනුවෙන් පෙනී සිටි ජනාධිපති නීතිඥ අනුජ ප්‍රේමරත්න කියා සිටියේ, තැන්පත්කරුවන්ට සාධාරණයක් ඉටු කිරීම සම්බන්ධයෙන් උපරිම සහාය ලබා දෙන බවයි.
දෙපාර්ශ්වය දැක්වූ කරුණු සලකා බැලූ මහේස්ත්‍රාත්වරිය සිද්ධියට අදාළ කරුණු ඇතුළත් වාර්තාවක් ජූලි මස 23 වන දා අධිකරණයට ඉදිරිපත් කරන ලෙසට අපරාධ පරීක්ෂණ දෙපාර්තමේන්තුවට එසේ නියෝග කළා.
