මෙරටට ගෙන්වා ඇති බොරතෙල්වල ප්‍රමිතිය සම්බන්ධයෙන් මහජන උපයෝගිතා කොමිසමේ සභාපතිවරයා සිදුකර ඇති ප්‍රකාශය පිළිබඳ ඛනිජතෙල් සංස්ථාව නීතිමය පියවර ගන්නා බව විදුලිබල හා බලශක්ති අමාත්‍ය කංචන විජේසේකර පවසනවා.
සිය ටිවිටර් ගිණුමේ සටහනක් තබමින් ඔහු කියා සිටියේ, ඛනිජ තෙල් සංස්ථාව සතුව ප්‍රමාණවත් තරම් ඉන්ධන තොග පවතින බවයි.
විදුලි කප්පාදුව දිර්ඝ කිරීමක් සඳහා විදුලිබල මණ්ඩලය ඉල්ලුම් කර ඇත්තේ ලක්ෂපාන බලාගාරය බිඳවැටීම, ඩීසල්, දැවි තෙල් සහ ජල කළමනාකරණය සඳහා ප්‍රමාණවත් අරමුදල් නොමැතිකම හේතුවෙන් බව ද අමාත්‍යවරයා සිය ටිවිටර් ගිණුමේ සදහන් කර තිබෙනවා.
මේ අතර, නොරොච්චෝලේ බලාගාරයේ හදිසි ගල් අගුරු අවශ්‍යතා සපුරාලීම සඳහා පසුගිය වසරවල ටෙන්ඩර්වලින් ඉතිරි ව ඇති ගල් අගුරු තොග ගෙන්වා ගැනීමට පියවර ගන්නා බවත් විදුලිබල හා බලශක්ති අමාත්‍ය කංචන විජේසේකර පවසනවා.
සිය ට්විටර් ගිණුමේ සටහනක් තබමින් ඔහු කියා සිටියේ, එහි පළමු නෞකාව සඳහා අත්තිකාරම් මුදල් ගෙවීම සිදු කළ බව යි.
ගල් අගුරු සම්පූර්ණ අවශ්‍යතාව සපුරා ගැනීමට අදාළ දීර්ඝ කාලීන ටෙන්ඩර් සහ අත්පිට මිල දී ගැනීම්වලට අදාළ ටෙන්ඩර් මෙම සතිය තුළ ප්‍රකාශයට පත් කරන බව ද ඔහු කියා සිටියා.
නොරොච්චෝලේ ලක්විජය ගල් අගුරු බලාගාරය සඳහා ගල් අගුරු මිල දී ගැනීමට විවෘත කළ ටෙන්ඩරය අවලංගු වීමත් සමඟ අද ක්ෂණික මිල දී ගැනීම් සඳහා ටෙන්ඩර් කැඳවන බව ලංකා ගල් අගුරු සමාගම පසුගිය දා ප්‍රකාශ කර තිබූ පසුබිමක යි අමාත්‍යවරයා මෙම ට්විටර් සටහන තබා ඇත්තේ.
