රක්ෂිත බන්ධනාගාරගත කර සිටින පොලිස්පති දේශබන්දු තෙන්නකෝන් ඉවත් කිරීම සඳහා කමිටුවක් පත් කිරීම වෙනුවෙන් ඊට අදාළ යෝජනාව අප්‍රේල් 8 වැනිදා විවාදයකින් තොරව පාර්ලිමේන්තුවට ඉදිරිපත් කිරීමට නියමිතව තිබෙනවා.
කථානායකවරයා මෙලෙස එකඟ වී ඇත්තේ, අද (02) පැවති පක්ෂ නායක රැස්වීමේදීයි.
කථානායකවරයාගේ ප්‍රධානත්වයෙන් එම කාරක සභාව රැස්වූ අතර එහිදී ආණ්ඩු පක්ෂය මෙම ත්‍රිපුද්ගල කමිටුව පිළිබඳ යෝජනාව ඉදිරිපත් කළා.
විවාදයකින් තොරව මේ මස 08 වැනිදා පස්වරුවේ අදාළ යෝජනාව පාර්ලිමේන්තුවට ඉදිරිපත් කිරීමට තීරණය කර තිබෙනවා.
කථානායකවරයා පත් කරන මෙම කමිටුවට අගවිනිසුරුවරයා පත් කරන විනිසුරුවරයෙක්, ජාතික පොලිස් කොමිෂන් සභාවේ සභාපතිවරයා සහ අගමැති, විපක්ෂ නායක එකඟතාවයෙන් පත් වන නියෝජිතයෙක් ඇතුළත් වනවා.
ත්‍රිපුද්ගල කමිටුව 08 වැනිදා පත් කිරීමෙන් පසු දේශබන්දු තෙන්නකෝන් සම්බන්ධයෙන් චෝදනා විමර්ශනය කිරීම ආරම්භ කිරීමට නියමිතයි.
පොලිස්පති දේශබන්දු තෙන්නකෝන් සේවයෙන් පහ කිරීමේ යෝජනාව ආණ්ඩුවේ මන්ත්‍රීවරුන් 115 දෙනෙකුගේ අත්සනින් යුතුව කථානායක ජගත් වික්‍රමරත්න වෙත පසුගියදා භාර දුන්නා.
