තමන් නියෝජ්‍ය කථානායක ධුරයේ කටයුතු කිරීම අදින් (30) අවසන් බව නියෝජ්‍ය කථානායක රංජිත් සියඹලාපිටිය පවසනවා.
ඒ ඔහුගේ ප්‍රධානත්වයෙන් අද (30) පැවති විශේෂ ප්‍රවෘත්ති සාකච්ඡාවක් අමතමින්.
ශ්‍රී ලංකා නිදහස් පක්ෂය සියලු තනතුරුවලින් ඉවත් වී, ස්වාධීන වීමට තීරණය කළ පසු, නියෝජ්‍ය කථානායක ධුරය ස්වාධීන තනතුරක් වුව ද, එම තනතුර ආණ්ඩු පක්ෂයෙන් යෝජනා වීම හේතුවෙන්, එම ධුරයෙන් ඉවත් වීමට තමන් මීට පෙර තීරණය කළ බවත්, එම ලිපිය ජනාධිපති ගෝඨාභය රාජපක්ෂ පිළිගෙන පාර්ලිමේන්තුවට ඉදිරිපත් කළ යුතු බවත් ඔහු සඳහන් කළා.
නමුත් තවමත් එම ලිපිය ජනාධිපතිවරයා විසින් පාර්ලිමේන්තුවට ඉදිරිපත් කර නොමැති බවත්, යළිත් ඊයේ (29) දිනයේ දී ලිපි දෙකක් ජනාධිපති සහ කථානායක මහින්ද යාපා අබේවර්ධන වෙත යවා ඇති අතර, අද සිට ක්‍රියාත්මක වන පරිදි තමන් නියෝජ්‍ය කථානායක ධුරයෙන් ඉල්ලා අස්වූ බවත්, එළඹෙන 04 වැනි දින පාර්ලිමේන්තු සැසියේ දී සිදු කළ යුතු පළමු කාර්යය වන්නේ නියෝජ්‍ය කථානායකවරයෙකු තෝරාපත් කරගැනීම බවත් රංජිත් සියඹලාපිටිය අවධාරණය කරනවා.
වත්මන් රජය බලයට පත් වූ වහාම කළ පළමු වරද වන්නේ, රාජ්‍ය ආදායම අඩු කරගෙන, වියදම් සඳහා රුපියල් ට්‍රිලියන 03ක් මුද්‍රණය කිරීමට කටයුතු කිරීම බවත් මුදල් අච්චු ගැසූ විට නියත වශයෙන් රට තුළ ආර්ථික මූල්‍ය අවපාතයක් නිර්මාණය වන බව ආර්ථික විද්‍යාව සම්බන්ධයෙන් සාමාන්‍ය දැනුමක් ඇති අයෙකු පවා දන්නා කාරණයක් බවත් ඔහු පවසනවා.
වත්මන් මහබැංකු අධිපතිවරයා වන ආචාර්ය නන්දලාල් වීරසිංහ සිදු කළ පළමු සාධනීය පියවර වන්නේ බැංකු පොළී අනුපාතය 1-1 අනුපාතය යටතේ වැඩි කිරීම බවත්, එහෙත් එය පමණක් සුදුසු නොවන බවත්, නියෝජ්‍ය කථානායකවරයා අවධාරණය කරනවා.
