ශ්‍රී ලංකාව මේ වනවිට මුහුණ පා සිටින විදේශ විනිමය අර්බුදයෙන් ගොඩ ඒම සඳහා රටට ඩොලර් ආදායම් ක්ෂණිකව සපයා ගත හැකි යෝජනාවලියක් ආණ්ඩු පක්ෂ පාර්ලිමේන්තු මන්ත්‍රීනී ඩයනා ගමගේ මහත්මිය පසුගිය 08 වනදා පාර්ලිමේන්තුවට ඉදිරිපත් කර සිටියා.
ඒ අනුව,
- ශ්‍රී ලංකා ආයෝජන මණ්ඩලය ප්‍රතිසංවිධානය කිරීම
- විදුලියෙන් ධාවනය වන බස් රථ සහ කාර් නිෂ්පාදන කර්මාන්තශාලාවක් ඇරඹීම
- මරදාන සහ කොළඹ කොටුව දුම්රිය ස්ථාන ආශ්‍රිතව මිශ්‍ර සංවර්ධන කේන්ද්‍ර දෙකක් ගොඩනැඟීම
- වෛද්‍ය විද්‍යාත්මක භාවිතය සඳහා අපනයනය කිරීමට කංසා වාණිජමය වශයෙන් වගාකිරීම
- සංචාරක කර්මාන්තය වෙනුවෙන් මන්නාරම් දූපත සම්පූර්ණයෙන්ම වෙන්කර සංවර්ධනය කිරීම
- රටට විදේශ විනිමය ගෙන්වීම සඳහා විදෙස් රටවල ඇති ශ්‍රී ලංකා තානාපති කාර්යාලවලට ඉලක්ක ලබාදීම
යනාදී යෝජනාවලියක් ඒ මහත්මිය පාර්ලිමේන්තුවට ඉදිරිපත් කළ අතර එහි ඇතැම් යෝජනා සම්බන්ධයෙන් තමන් දැනටමත් ආයෝජකයින් සමග සාකච්ඡා කර ඇති අතර අවශ්‍ය අනුමැතිය ලබාදෙන්නේ නම් ඒවා ඉතාමත් ඉක්මනින් ක්‍රියාත්මක කළහැකි බවයි ඒ මහත්මිය අවධාරණය කරන්නේ.
