“සමාජ මාධ්‍ය මර්දනය එපා” – නිදහස් මාධ්‍ය ව්‍යාපාරය

සමාජ මාධ්‍ය ඔස්සේ පුරවැසියන් දක්වන අදහස් අනීතික ලෙස මර්දනය කිරීමට පොලිසිය සහ ආරක්ෂක අංශ  කටයුතු කරමින් සිටින්නේ යැයි නිදහස් මාධ්‍ය ක්‍රියා ව්‍යාපාරය චෝදනා කරයි.
ජාතික ආරක්ෂාව තහවුරු කිරීම, වෛරී ප්‍රකාශන වැළැක්වීම හා අසත්‍ය ප්‍රචාර වැලැක්වීම යන කරුණුවලට මුවාවෙමින් මෙම මැදිහත්වීම සිදු වන්නේ යැයි නිදහස් මාධ්‍ය ව්‍යාපාරය නිවේදනයක් නිකුත් කරමින් සඳහන් කරයි.
පසුගිය නොවැම්බර් මාසේදීයේදී උතුරු නැගෙනහිර විශාල පිරිසක් මේ ආකාරයෙන් බාධා කිරීම්වලට ලක්ව ඇතැයි ද රඳවාගෙන ප්‍රශ්න කිරීම් වලට ලක් කර ඇතැයිද එහි කැඳවුම්කාරිනී සීතා රංජනී හා ලේකම් ලසන්ත ද සිල්වාගේ අස්සනින් යුතුව එම සංවිධානය නිකුත් කළ නිවේදනයේ සඳහන් වේ.
කොරෝනා වසංගතය සම්බන්ධයෙන් සමාජ මාධ්‍යවල විවිධ අදහස් පළ කළ පුද්ගලයන් අත්අඩංගුවට ගැනීම් රජය දිගින් දිගටම කළ බවත්  තවදුරටත් අත්අඩංගුවට ගැනීම් කිරිමට නියමිත බව පොලීසිය ප්‍රකාශ කළ බවද එම නිවේදනයේ සදහන් වේ.
ඒ අනුව මෙම තත්ත්වය සම්බන්ධයෙන් සිය බලවත් කණස්සල්ල පළ කරන නිදහස් මාධ්‍ය ව්‍යාපාරය ඒ ගැන කඩිනම් අවධානය යොමුකර ව්‍යවස්ථාපිත අයිතිවාසිකමක් වූ අදහස් ප්‍රකාශ කිරීමේ අයිතිය තහවුරු කිරීමට වහාම මැදිහත් වන්නැයි රජයට බල බලකරන බවද වැඩිදුරටත් සඳහන් කරයි.