උතුරු පළාතේ රජයේ රෝහල්වල වෛද්‍යවරුන් සංකේත වර්ජනයක් ආරම්භ කර තිබෙනවා.
ඒ යාපනය චාවකච්චේරි රෝහලට අලුතින් පත් කෙරුණුවෛද්‍ය අධිකාරීවරයාගේ ක්‍රියාකලාපයට විරෝධය පළ කරමින්.
කෙසේවෙතත් රජයේ රෝහල්වල හදිසි සහ අත්‍යාවශ්‍ය සේවා පමණක් සිදුකරන බවයි ඔවුන් පවසන්නේ.
රජයේ වෛද්‍ය නිලධාරීන්ගේ සංගමයේ උතුරු පළාත් කාර්යාලය නිවේදනය කර ඇත්තේ අලුතින් පත් කළ මෙම වෛද්‍ය අධිකාරීවරයාගේ ප්‍රකාශයන් නිසා දැනට සේවයේ නිරත උතුරේ වෛද්‍යවරුන්ගේ ජීවිත දැඩි අවදානමකට ලක්ව ඇති බවයි.
ඒ හේතුවෙන්, ඔහුට එරෙහිව ක්‍රියාමාර්ගයක් ගන්නා ලෙස එම වෛද්‍යවරුන් ඉල්ලා සිටිනවා.
අදාළ වෛද්‍ය අධිකාරීවරයා චාවකච්චේරි රෝහලට පැමිණ සෞඛ්‍ය බලධාරින් රෝගීන්ට ලැබිය යුතු දේ හොරාකමින් විවිධ දූෂණ සිදු කරන ආකාරය පිළිබඳව වීඩියෝවක් සමාජ මාධ්‍යට මුදාහැරීමත් සමඟ ඊට උරණ වූ යාපනයේ වෛද්‍යවරුන් පිරිසක් චාවකච්චේරි රෝහලට පැමිණ ඔහුට පහරදී දුරකතනය උදුරාගැනීමට තැත් කර තිබෙන බවද වාර්තා වෙනවා.
කෙසේ වෙතත් මේ වන විට චාවකච්චේරි රෝහල වසා දමා ඇති අතර වෛද්‍ය අධිකාරීවරයා පමණක් රෝහල තුළ සිටිමින් රාජකාරී කටයුතු වල නිරත වන බව සඳහන්.
මේ අතර, යාපනය චාවකච්චේරි මූලික රෝහලේ වැඩබලන වෛද්‍ය අධිකාරිවරයා අත්අඩංගුවට නොගන්නා ලෙස ඉල්ලා ප්‍රදේශවාසීන් යාපනය නුවර ඒ 09 මාර්ගය අවහිරකරමින් අද (08) විරෝධතාවක නිරත වී තිබෙනවා.
යාපනය සෞඛ්‍ය බලධාරීන් විසින් වැඩබලන වෛද්‍ය අධිකාරි රාමනාදන් අර්ජුන මහතා ස්ථාන මාරුකොට ඇති බවට ඊයේ (07) රාත්‍රියේ ලිපියක් මගින් දැනුම් දී තිබුණා.
එහිදී වෛද්‍ය අධිකාරීවරයා එම ලිපිය භාර නොගැනීමත් සමඟ චාවකච්චේරි පොලිසිය පැමිණ ඔහු අත්අඩංගුවට ගැනීමට උත්සාහ කිරීමේදී ප්‍රදේශවාසීන් හා රෝහල් කාර්ය මණ්ඩලය ඊට විරෝධය පළ කර ඇති බවයි වාර්තා වෙන්නේ.
ඒ, වෛද්‍ය අධිකාරිවරයා අත්අඩංගුවට නොගන්නා ලෙසත් ඔහුව එම රෝහලෙන් ඉවත් නොකරන ලෙසත් ඉල්ලා සිටිමින්.
විරෝධතාවය හේතුවෙන් මාර්ගයේ දැඩි රථාවාහන තදබදයක් ඇතිව තිබු අතර චාවකච්චේරි රෝහල වසා දැමීමටද පියවරගෙන තිබුණා.
