ජාතික නිවාස අධිකාරියේ සභාපති සහ හිටපු පාර්ලිමේන්තු මන්ත්‍රී දුමින්ද සිල්වා විසින් මාධ්‍යවේදී රාහුල් සමන්ත හෙට්ටිආරච්චි මහතා හට දුරකථනයෙන් තර්ජනය කළ බවට නිදහස් මාධ්‍ය ව්‍යාපාරය විසින් මාධ්‍ය නිවේදනයක් නිකුත් කරමින් දන්වා සිටිනවා.
077-2624202 යන දුරකථන අංකයෙන් මාධ්‍යවේදී රාහුල් සමන්ත හෙට්ටිආරච්චි මහතා හට දුරකථන ඇමතුමක් ලබා දෙමින් තමා හිරු මාධ්‍ය නාලිකාවේ ප්‍රධනියාගේ සහෝදරයා බවත් අම්බලන්තොට වැලි ජාවාරම සම්බන්ධයෙන් දර්ශන වාර්තා කිරීමෙන් වළකින ලෙසට තමන්ට පැවසූ බවත් සමන්ත හෙට්ටිආරච්චි මහතා නිදහස් මාධ්‍ය ව්‍යාපාරයට දන්වා ඇති අතර ඊට අදාල හඬපට ද ලබාදී තිබෙනවා.
දුරකථන අංකය සම්බන්ධව පරීක්ෂා කිරීමේදී එය දුමින්ද සිල්වා හට අයත් බව තහවුරු වූ බවයි සමන්ත හෙට්ටිආරච්චි මහතා පවසන්නේ.
මාධ්‍ය ආයතනයක හිමිකම් කියන තැනැත්තෙකුට සම්බන්ධ අයෙකු ලෙස දුමින්ද සිල්වා විසින් මාධ්‍යවේදියෙකුට බලපෑම් කිරීම මාධ්‍ය නිදහසට එල්ලවූ තර්ජනයක් බවත් එය හෙලා දැකිය යුතු අශෝභන ක්‍රියාවක් බවත් අදාල නිවේදනයේ සඳහන්.
එබැවින් මේ සම්බන්ධයෙන් සොයා බලන ලෙසයි නිදහස් මාධ්‍ය ව්‍යාපාරය විසින් රජයෙන් ඉල්ලා සිටින්නේ.
