රස වැඩියෙන්, ලුණු අඩුවෙන් කන්න – ශිරන්ති රාජපක්ෂ

අධික ලුණු භාවිතය සෞඛ්‍යයට අහිතකර ලෙස බලපාන අතර අධි රුධිර පීඩනය සහ ඊට අදාළ සංකූලතා ඇතිවීමේ අවධානනම ඉහළ යන බව අග්‍රාමාත්‍ය කාර්යාලය නිවේදනය කරනවා.

මෙම අදහස් පලව ඇත්තේ අග්‍රාමාත්‍ය ආර්යා ශිරන්ති රාජපක්ෂ මහත්මියගේ ප්‍රධානත්වයෙන් ඊයේ (30) පස්වරුවේ කොළඹ ගාලු මුවදොර හෝටලයේදී පැවති ශ්‍රී ලංකා පෝෂණ වෛද්‍ය සංගමය සංවිධානය කළ “රස වැඩියෙන් ලුණු අඩුවෙන් ආහාර පිසීමේ ජාතික අභියෝගය 2021′ අවසන් මහා තරඟයේදීයි.

ලුණු අඩු ආහාරවේලක ඇති වැදගත්කම පිළිබදව ආහාර තාක්ෂණ සහ සූප ශාස්ත්‍ර කටයුතුවල නියුතුවන්නන් මෙන්ම මහජනතාවට අවබෝධයක් ලබාදීමට මෙම තරඟාවලිය සංවිධානය කර තිබෙනවා.

ලෝක සෞඛ්‍ය සංවිධානය, සෞඛ්‍ය අමාත්‍යංශය සහ ශ්‍රී ලංකා සූපවේදීන්ගේ සංගමයේ සහයෝගය ඇතිව ශ්‍රී ලංකා පෝෂණ වෛද්‍ය සංගමය සංවිධානය කළ මෙම තරඟාවලියේ පළමු වටය සඳහා නිර්ණායක සපුරණලද සාමාජිකයින් තිදෙනෙකුගෙන් සමන්විත කණ්ඩායම් 40 ක් මේ සඳහා තරඟ වැදුණා.

එම කණ්ඩායම් 40 න් අවසාන වටයට තේරී පත්වූ කණ්ඩායම් 5 ක් ඊයේ දිනයේ තරඟ වැදී තිබෙනවා.

එහි ප්‍රධාන ආරාධිත අමුත්තිය ලෙස සහභාගීවූ අග්‍රාමාත්‍ය ආර්යාව අවසන් තරඟකරුවන් සමඟ සුහද කතාබහක යෙදී ඔවුන් පිසූ ආහාරවල රස බැලීමට කටයුතු කළා.