ජ්‍යෙෂ්ඨ මාධ්‍යවේදී එල්මෝ ගුණරත්න මහතා අද (28) පෙරවරුවේ සිය නිවසේදීම අභාවප්‍රාප්ත වී තිබෙනවා.
ඒ මහතා මීට දින කිහිපයක පටන් කොවිඩ් 19 වෛරසය ආසාදනය වී නිරෝධායනය වෙමින් සිටියා.
මිය යන විට ඒ මහතාගේ වයස අවුරුදු 89 ක්.
එමෙන්ම එල්මෝ ගුණරත්න මහතාගේ වැඩිමහල් පුතු වන දමිත ගුණරත්න මහතාද ඊයේ (27) රාත්‍රියේ අභාවප්‍රාප්තවී තිබෙනවා.
දමිත ගුණරත්න මහතාද කොවිඩ් 19 වෛරසය ආසාදනයවී ප්‍රතිකාර ලබමින් සිටියා.
එල්මෝ ගුණරත්න මහතා දශක 6ක් පුරා මෙරට පුවත්පත් කලාවට විශිෂ්ට සේවාවක් ඉටු කළ ජ්‍යෙෂ්ඨතම මාධ්‍යවේදියෙකු වනවා.
ඔහු ‘සිංහලයා’ පුවත්පතින් සිය ජනමාධ්‍ය කලාව ආරම්භ කර පසුව ලේක්හවුස් ආයතනයට සම්භන්ධ වූවා.
පසුව ලේක්හවුස් ආයතනය රජයට පවරා ගැනීමත් සමග ඊට විරෝධය පළ කරමින් එම ආයතනයෙන් ඉල්ලා අස්වුණා.
ඉන් අනතුරුව තායිලන්තය බලා පිටත්ව ගිය ඒ මහතා ‘බැංකොක් පෝස්ට්’ පුවත්පතේ ප්‍රධාන උපකර්තෘවරයා වශයෙන් කලක් සේවය කළා.
යළිත් 1978 දිවයිනට පැමිණි එල්මෝ ගුණරත්න මහතා එවකට පැවැති ‘ටයිම්ස් ඔෆ් සිලෝන්’ ආයතනයේ කළමනාකාර කර්තෘවරයා වශයෙන් රාජකාරී ආරම්භ කළා.
පසුව ලංකාදීප, සන්ඩේ ටයිම්ස් හා ඩේලිමිරර් යන පුවත්පත් තුනේම කතුවරයා ලෙස කටයුතු කළ එකම පුද්ගලයා ලෙසද එල්මෝ ගුණරත්න මහතා ඉතිහාසගත වුණා.
