අග්නිදිග ආසියාවේ දරුණුතම කොවිඩ්-19 ව්‍යාප්තියක් ඇති පිලිපීනයේ එන්නත්කරණ ක්‍රියාවලියට ජනතා සහභාගීත්වය අඩු බැවින්, එන්නත ලබාගැනීම ප්‍රතික්ෂේප කරන පුද්ගලයන් සිරගත කරන බවට එරට ජනාධිපති රොඩ්රිගෝ ඩුටාර්ටේ තර්ජනාත්මක පණිවුඩයක් ලබා දී ඇති බව Reuters වාර්තා කරනවා.
“ඔබට තෝරා ගන්න දැන් අවස්ථාව තියෙනවා. එක්කෝ එන්නතද? නැත්නම් හිර ගෙදරද?” යැයි මැනිලා අගනුවර එන්නත් මධ්‍යස්ථාන කිහිපයකම පවතින අඩු සහභාගීත්වය පිළිබඳව පෙන්වා දෙමින් ජනපති ඩුටර්ටේ විසින් රූපවාහිනී සකච්ඡාවකදී පිලිපීන ජනතාවට අවධාරණය කර සිටින ලදි.
කෙසේ වෙතත් ඩුටර්ටේගේ මෙම ප්‍රකාශය ඔහුගේ සෞඛ්‍ය බලධාරීන්ගේ ප්‍රකාශයට පටහැනි වන අතර, කොවිඩ්-19 එන්නත ලබා ගැනීම ස්වෙච්ඡාවෙන් සිදුවිය යුතු බව සෞඛ්‍ය මාර්ගෝපදේශය විය.
“මාව වැරදියට තේරුම් ගන්න එපා..! ඒත්, මේ රටේ අර්බුදයක් පවතිනවා පිලිපීන ජාතිකයන් රජයට අවනත නොවීම ගැන මා දැඩි කෝපයකින් මේ අවස්ථාවේ පසුවෙනවා.” ඩුටර්ටේ වැඩිදුරටත් පැවසීය.
ජුනි 20දා වනවිට පිලිපීන සෞඛ්‍ය අංශ විසින් මිලියන 2.1කට පමණක් සම්පූර්ණ එන්නත් මාත්‍රා ලබාදී ඇති අතර, මිලියන 110ක ජනතාවක් වෙසෙන රටක මේ වසරේ මිලියන 70ක් දක්වා ජනතාවට ප්‍රතිශක්තිකරණය ලබාදීමේ රජයේ ඉලක්කය ඉටු කරගැනීම තවමත් මන්දගාමී ප්‍රගතියක් ලබා ඇත.
වෛරසය පාලනය කිරීම සම්බන්ධයෙන් ඔහු දැරූ දරඳඩු ප්‍රතිපත්තිය විවේචනයට බඳුන් වුවද, ඩුටර්ටේ පාසල් නැවත විවෘත කිරීමටද ඉඩක් ලබා නොදෙන ලදි.
පිලිපීනයේ මත්ද්‍රව්‍ය උවදුර පාලනය කිරීම සම්බන්ධයෙන්ද ඩුටාර්ටේ ගනු ලැබුවේ මීටත් වඩා දරදඬු ප්‍රතිපත්තියකි. ඔහු සම්බන්ධයෙන් ජාත්‍යන්තර අපරාධ අධිකරණය හමුවේ පවා කරුණු ගොනුවන විට ඩුටාර්ටේ කියා සිටියේ තමාට සුදු ජාතිකයන් ඉදිරියේ නඩු විභාගයන්ට පෙනී සිටීමට තරම් පිස්සුවක් නොමැති බවයි.
