රත්නපුර නව නගරයේ ඊයේ (11) පස්වරුවේ සිදුවූ රිය අනතුරින් බරපතළ තුවාල ලබා රෝහල්ගත කළ පිරිස අතරින් එක් අයෙකු මියගොස් තිබෙනවා.
රත්නපුර නව නගරයේදී මෝටර් රථයක් සහ යතුරුපැදි තුනක් එකිනෙක ගැටීමෙම අනතුර සිදුව තිබුණේ ඊයේ පස්වරුවේදීයි.
කුරුවිට සිට රත්නපුරය දෙසට අධික වේගයෙන් ධාවනය වූ මෝටර් රථය වේගය පාලනය කරගත නොහැකිව ප්‍රතිවිරුද්ධ දෙසින් පැමිණි යතුරු පැදි තුනක ගැටී මෙම අනතුර සිදුව තිබුණු අතර අනතුර හේතුවෙන් යතුරුපැදිවල ගමන්ගත් පුද්ගලයින් පස් දෙනෙකු බරපතළ තුවාල ලබා තිබුණා.
ප්‍රදේශවාසීන් එක්ව තුවාලකරුවන් කඩිනමින් රත්නපුර රෝහලට ඇතුළත් කිරීමට පියවර ගෙන තිබූ අතර අසාධ්‍ය තත්ත්වයේ පසුවූ එක් අයෙකු අද (12) අලුයම මියගොස් තිබෙනවා.
මෙලෙස මියගොස් ඇත්තේ, කුරුවිට ප්‍රදේශයේ පදිංචි කවිඳු ගවේශාන් නමැති 20 හැවිරිදි අවිවාහක තරුණයෙක්.
රෝහල්ගතකළ සෙසු සිව්දෙනාගේ තත්ත්වයද මේ වනවිටත් බරපතළ බව වාර්තා වනවා.
අනතුර සිදුකළ මෝටර් රථය පැදවූ රියදුරු එම ස්ථානයෙන් පළාගොස් පසුව රත්නපුර පොලීසියට භාරවී තිබුණා.
ඔහු ඕපනායක හුණුවල ප්‍රදේශයේ පදිංචිකරුවෙකු වන අතර, සැකකරු අධිකරණයට අද ඉදිරිපත් කිරීමට නියමිතයි.
