පොහොර ගෙන්වීම නැවැත්වීම ගෝඨාභය රාජපක්ෂ ආණ්ඩුවේ නොමනා තීරණයක් බව අපේ ජනබලය පක්ෂයේ පාර්ලිමේන්තු මන්ත්‍රී අතුරලියේ රතන හිමියන් ඊයේ (10) පාර්ලිමේන්තුවේදී ප්‍රකාශ කළා.
“වස විස නැති රටක්” වැඩසටහන ප්‍රවර්ධනය කළ නිසා පසුව එම තීරණය සම්බන්ධයෙන් දෝෂාරෝපණ තමන්ට ආරෝපණය කර තමන්ව බිල්ලන් බවට පත්කළ බව රතන හිමියන් එහිදී පවසා සිටියා.
මෙම අදූරදර්ශී තීරණය ගෝඨාභය රාජපක්ෂ ආණ්ඩුව, එහි කැබිනට් මණ්ඩලය සහ බැසිල් රාජපක්ෂ ප්‍රමුඛ 45 දෙනෙකු විසින් ගත් තීරණයක් බව රතන හිමි පැවසුවා.
විවිධ ආයතනවල වාර්තාවලට අනුව කෑම බීම නොමැති කමින් ග්‍රාමීය පාසල්වල සියයට 50ක දරුවන් පාසල් හැර ගොස් තිබෙන බව උන්වහන්සේ පවසා තිබුණා.
“ඒක එදා ඔබතුමාගේ ආණ්ඩුව ගත්ත වල් බූරු තීරණයක්. ඒ චෝදනා අපට ආරෝපණය කළා. එයට අප සම්බන්ධ වූයේ අප “වස විසෙන් තොර රටක්” යන මතවාදය ප්‍රවර්ධනය කළ බැවින්. 2017 ඉඳන් 2019 වෙනකම් අපි ඒ විදියටම වැඩ කළා මිසක් පොහොර ගෙන්වීම නවත්වන්න කියලා අපි කිව්වේ නැහැ කියලා ඇමැතිතුමා විදියට ඔබ දන්නවා. ඒ ආණ්ඩුවට පොහොර දෙන්න සල්ලි නැති නිසා තමයි ඒ තීරණය ගත්තේ”
එළවලු මිල ඉහළ යෑම සහ මන්දපෝෂණය සම්බන්ධ ගැටළු සම්බන්ධයෙන් විශේෂ ප්‍රකාශයක් කරමින් රතන හිමියන් නැගූ ප්‍රශ්න මාලාවකට අගමැතිවරයා වෙනුවෙන් පිළිතුරු ලබාදුන් කෘෂිකර්ම ඇමැති මහින්ද අමරවීර මහතා සමඟ කළ හරස් සංවාදයකදී රතන හිමියන් මෙම අදහස් පවසා තිබෙනවා.
