ලබන වසරේ අවසාන කාලයේදී සිය Starship රොකට්ටුව අඟහරු වෙත ගමන් කිරීම සඳහා සූදානම් වනු ඇති බව SpaceXහි නිර්මාතෘ , ව්‍යවසායක එලොන් මස්ක් පවසා තිබෙනවා.
ඒ, රොකට්ටුවේ පියාසැරි පරීක්ෂණවල සිදු වූ පිපිරීම් කිහිපයක් සම්බන්ධයෙන් පරීක්ෂණ සිදු කෙරෙමින් පවතිම පසුබිමකයි.
ඊලෝන් මස්ක් X හි සටහනක් තබමින් පෙන්වා දී ඇත්තේ, මූලික මෙහෙයුම් බාධාවකින් තොරව සිදුවුවහොත් 2029 වසරේදී අඟහරු වෙත මිනිසුන් රැගෙන යාම ආරම්භ කළ හැකි වනු ඇති බවයි.
බොහෝදුරට එම සැලැස්ම ක්‍රියාත්මක කිරීම සඳහ 2031 වසර වන තෙක් කල් ගතවනු ඇති බවද ඔහු සඳහන් කර තිබෙනවා.
අඟහරු වෙත මිනිසුන් රැගෙන යාමේ සැලැස්ම පිළිබඳ ඊලොන් මස්ක් පළමු වරට අදහස් දැක්වූයේ 2016 වසරේ පැවති ජාත්‍යන්තර අජටාකාශගාමී සම්මේලනයේදීයි.
අඟහරු ග්‍රහලෝකය වෙත ගමන් කිරීමේ අභිලාශයන් සාර්ථක වීමට නම් මීටර් 123 ක උසකින් නිර්මාණය කරන ලද දැවැන්ත Starship රොකට්ටුවේ නිසි ක්‍රියාකාරීත්වය වඩාත් වැදගත් වනවා.
කෙසේවෙතත්, පරීක්ෂණ වලදී එය විවිධ අසාර්ථක තත්වයන්ට මුහුණ දී තිබෙනවා.
මෙම පරීක්ෂණවල එක් පියවරක් වශයෙන් පසුගිය සතියේ ටෙක්සාස් සිට දියත් කළ එක් රොකට්ටුවක්ද පුපුරා ගොස් තිබුණා.
