තමන් නව අග්‍රාමාත්‍යවරයා වශයෙන් පත්වන බවට හිරු මාධ්‍ය ජාලය හරහා ප්‍රචාරය කර ඇති අසත්‍ය පුවතකට සමගි ජනබලවේගය පක්ෂයේ පාර්ලිමේන්තු මන්ත්‍රී ෆීල්ඩ් මාෂල් සරත් ෆොන්සේකා මහතා ප්‍රතිචාර දක්වා තිබෙනවා.
ෆොන්සේකා මහතා පවසන්නේ මෙය අසත්‍ය ප්‍රචාරයක් බවත් මෙවැනි පුවත් පලකර ජනතාව නොමඟ යැවීමේ උත්සාහය තමන් තරයේ හෙලා දකින බවයි.
ගෝඨාභය රාජපක්ෂ ජනාධිපතිව සිටින රජයක කිසිදු තනතුරක් ලබාගැනීම තමන් එක හෙලා ප්‍රතික්ෂේප කරන බව පවසන සරත් ෆොන්සේකා මහතා සමස්ථ ශ්‍රීලාංකීය ජාතියම සාමකාමී අවිහිංසාවාදී පුරවැසි අරගලයක් හරහා ඉල්ලා සිටින ප්‍රධාන ඉල්ලීම් සමඟ තමන්ද කොන්දේසි විරහිතව සිටගන්නා බව සදහන් කරනවා.
ගාලුමුවදොර විරෝධතා භූමියේ සිට රට වෙනුවෙන්, ජනතාව වෙනුවෙන්, දැයේ දුවාදරුවන්ගේ අනාගතය වෙනුවෙන් හඬ නගන ජනතාවගේ ඉල්ලීම් පිලිබදව තමන් අතිශය සංවේදී බවත්, ආරම්භයේ සිටම අරගලයේ නියුතු අභීත සටන්කාමී පුරවැසි දූදරුවන්ට හදවතින්ම ආශිර්වාද කල තමන් කිසිවිටෙකත් ගාලුමුවදොර අරගලකරුවන් සමඟ සාකච්ඡාවකින් තොරව රාජපක්ශලාගේ අර්බුදය විසදීමේ කොටස්කරුවකු නොවන බවත් සඳහන් කරනවා.
