අම්පාර – මාවඩ්ඩිපල්ලි ප්‍රදේශයේදී ට්‍රැක්ටර් රථයක් පෙරලීමෙන් අතුරුදන් සිසුන් සොයා තවදුරටත් මෙහෙයුම් ක්‍රියාත්මක බව වාර්තා වෙනවා.
පොලිසිය සඳහන් කළේ මෙම අනතුරින් ළමුන් 06 දෙනෙකු, ට්‍රැක්ටර් රථයේ රියදුරු හා ඔහු සමඟ ගමන් කළ තවත් පුද්ගලයෙකු ගංවතුරට ගසා ගෙන ගොස් මේ වන විට අතුරුදහන් වී ඇති අතර ඊයේ (27) රාත්‍රිය වන විට ළමුන් 05 දෙනෙකු දිවි බේරාගෙන ඇති බවයි.
මෙලෙස අතුරුදහන් වූ ළමුන් අවුරුදු 12 ත් 16 ත් අතර වයස්වල පසුවන සමන්තුරය ප්‍රදේශයේ පදිංචිකරුවන් පිරිසක්.
ඊයේ දින සවස් කාලයේ කාර්තිව් පොලිස් වසමේදී නින්දවුර් සිට සමන්තුරය දෙසට ධාවනය වූ පිරිමි ළමුන් 11 දෙනෙකු රැගත් අදාළ ට්‍රැක්ටර් රථය ගංවතුර හේතුවෙන් කාර්තිව් බස් නැවතුම්පොළ ආසන්නයේ පිහිටි පාලම අසලින් පෙරළී ගොස් තිබුණා.
අනතුරු සිදු වන අවස්ථාවේ ට්‍රැක්ටර් රථයේ 13 දෙනෙකු ගමන් කර තිබෙනවා.
සිසුන් නින්දවුර් මද්‍රසා පාසලේ සිට නිවෙස් බලා ට්‍රැක්ටර් රථයෙන් ගමන් කරමින් සිටියදී අනතුරට ලක්ව ඇති බවට දැනට සිදු කරන ලද විමර්ශනයේදී අනාවරණය වී තිබෙනවා.
පොලිසිය හා ප්‍රදේශවාසීන් එක්ව අතුරුදහන් වූ ළමුන් සොයා මෙහෙයුම් කටයුතු සිදු කරනු ලබනවා.
