මෙරට සිදු වී යැයි කියන යුද අපරාධ සම්බන්ධයෙන් ජාත්‍යන්තර යුද අධිකරණයට පැමිණිලි කිරීමට උතුරේ දේශපාලන කණ්ඩායම්වල අවධානය යොමු වී තිබේ.
දෙමළ ජාතික මහජන පෙරමුණේ (ටී.එන්.පී.එෆ්) නායක ගජේන්ද්‍රකුමාර් පොන්නම්බලම් මහතා එක්සත් ජාතින්ගේ සංවිධායේ මෙරට නේවාසික සම්බන්ධීකාරක හනා සිංගර් මහත්මියට මේ බව දන්වා ඇත.
එක්සත් ජාතින්ගේ මානව හිමිකම් කවුන්සිලයේ ප්‍රශ්නය රඳවා ගැනීමෙන් දෙමළ ජනයාට සාධාරණයක් ඉටු නොවන බැවින් මෙවැනි පියවරක් ගැන සිතා ඇති බව පොන්නම්බලම් මහතා එක්සත් ජාතින්ගේ සංවිධායේ මෙරට නේවාසික සම්බන්ධීකාරකවරියට අවධාරණය කර ඇත.
මෙරට සිදු වී යැයි කියන ජනසංහාරය හා මානව හිමිකම් කඩවීම්වලට ශ්‍රී ලංකා රජය වගකිව යුතු යැයි ද කිසිදු ආණ්ඩුවකට එයින් බේරෙන්නට නොහැකි යැයි ද පවසා ඇති පොන්නම්බලම් මහතා වගවීමකින් තොරව සංහිඳියාවක් නැති බව ආණ්ඩුවට අවධාරණය කරන්නැයි සිංගර් මහත්මියගෙන් ඉල්ලා ඇත.
ඔහු මෙම කරුණු දැනුම්දීම කර ඇත්තේ කොළඹදී පැවැති විශේෂ සාකච්ඡාවකදීය.
එකම රටක් එකම නීතියක් යැයි පවසන කණ්ඩායමක් විසින් සකසන නව ආණ්ඩුක්‍රම ව්‍යවස්ථාව ගැන තමන්ට කිසිදු විශ්වාසයක් නැතැයි ද එයින් දෙමළ ජනතාවට යුක්තියක් ඉටු නොවනු ඇතැයි ද පොන්නම්බලම් මහතා සඳහන් කර ඇත.
වගවීමක් පිළිබඳ හැඟීමක්වත් තමන්ට නැති බව මාරුවෙන් මාරුවට බලයට පත් වූ ආණ්ඩු පසුගිය කාලයේදී හොඳින් ඔප්පු කර ඇතැයි ද එනිසා යුක්තිය පමාවීම ගැන ජාත්‍යන්තර අවධානය දැන් අවශ්‍ය යැයි ද පොන්නම්බලම් මහතා මෙහිදී වැඩිදුරටත් සඳහන් කර ඇත.
