පවතින අයහපත් කාළගුණයත් සමඟම ගම්පොළ – නුවරඑළිය මාර්ගයේ අටබාගේ ප්‍රදේශයේ හෝටලයක් පවත්වාගෙන ගිය ගොඩනැගිල්ලක් නාය ගොස් අටබාගේ ඔයට පෙරළී තිබෙනවා.
ගම්පොල පොලීසිය පවසන්නේ මෙම ස්ථානයේ අයිතිකරු හා ඔහුගේ පුත්‍රයා රාත්‍රීයේ හෝටලය වසා දමා එළියට පැමිණි පසු මෙම ගොඩනැඟිල්ල නාය ගොස් ඇති බවයි =.
මේ දෙදෙනා එම හෝටලයට යාබද ඇති නිවෙසේ පදිංචිව සිටින අතර එම නිවසේ ද කොටසක් මෙම නාය යාමට හසුව තිබෙනවා.
මෙම නායයාම නිසා නුවරඑළිය මාර්ගය ද පුපුරා ගොස් ඇති බැවින් වාහන ගමනාගමනය එක් මංතීරුවකට සීමා කර ඇති බව ගම්පොල මූලස්ථාන පොලීසියේ වැඩ බලන ස්ථානාධිපති ප්‍රධාන පොලිස් පරීක්ෂක කපිල බණ්ඩාර මහතා පවසනවා.
තවදුරටත් නායයෑමේ අවධානමක් පවතින බැවින් අසල නිවාසවල සිටින පිරිසද එම ස්ථානවලින් ඉවත් කළ බව ආපදා කළමණාකරණ මධ්‍යස්ථානය සදහන් කරනවා.
