හිටපු අග්‍රාමාත්‍ය මහින්ද රාජපක්ෂ මහතාව යළිත් අග්‍රාමාත්‍ය ධුරයට පත් කිරීම සඳහා සුදානමක් පවතින බව වාර්තා වනවා.
ශ්‍රී ලංකා පොදුජන පෙරමුණේ ජ්‍යේෂ්ඨයින් පිරිසක් පසුගිය 02 වනදා මේ සම්බන්ධ විශේෂ සාකච්ඡාවක් පවත්වා තිබෙනවා.
අග්‍රාමාත්‍ය දිනේෂ් ගුණවර්ධන මහතාගේ නිවසේ පැවැති මෙම සාකච්ඡාව සඳහා ජොන්ස්ටන් ප්‍රනාන්දු, පවිත්‍රා වන්නිආරච්චි, නාමල් රාජපක්ෂ ඇතුළු පොහොට්ටුවේ පිරිසක් එක්ව ඇති බව සඳහන්.
කෙසේ වෙතත් මෙම සාකච්ඡාව සඳහා අමාත්‍ය ප්‍රසන්න රණතුංග මහතා එක්වනු ඇති බවට බලාපොරොත්තුවෙන් සිටි නමුත් අවසන් මොහොතේ අමාත්‍යවරයා ඊට සහභාගී නොමැති බවයි වාර්තා වන්නේ.
යළිත් වතාවක් පොහොට්ටුවේ ආණ්ඩුවක් පිහිටුවා ගත්තත් ඒ ආණ්ඩුව තුළ වුවත් තමන්ගේ පක්ෂය අර්බුදයට ලක් වීම මිසක් ඊට එහා දෙයක් සිදු නොවන බව මේ සාකච්ඡාවේ දී අවධානය යොමු වී තිබෙනවා.
මීට පිළියමක් ලෙස මහින්ද රාජපක්ෂ මහතා යළිත් අග්‍රාමත්‍ය ධුරයට පත්කිරීම අනිවාර්යෙන්ම සිදු විය යුතු බවයි එම මන්ත්‍රීවරුන්ගේ යෝජනාව වී ඇත්තේ.
ගෞරවාන්විත සමුගැනීමක් ලබාදීම සඳහා කෙටි කාලයකට මෙසේ මහින්ද රාජපක්ෂ මහතාව අගමැති ධුරයට පත් කිරීමට මෙහිදී පිරිසගේ අදහස වී තිබෙනවා.
කෙසේ වෙතත් පසුගියදා රුපවාහිනී වැඩසටහනකට එක්වෙමින් ආණ්ඩු පක්ෂ ප්‍රධාන සංවිධායක ප්‍රසන්න රණතුංග මහතා කියා සිටියේ මහින්ද රාජපක්ෂ මහතාව නැවත වතාවක් අගමැති ධුරයට පත් කිරීමට අවශ්‍ය නොවන බවයි.
එකඟතාවයකින් තොරව මෙම සාකච්ඡාව අවසන් වී ඇති බවයි දේශපාලන ආරංචි මාර්ග සඳහන් කරන්නේ.
