අග්‍රාමාත්‍ය මහින්ද රාජපක්ෂ මහතාට මෙරට පාලනය භාරගන්නා ලෙසට ට රකින ජන හඬ සංවිධානයේ කැඳවුම්කරු පූජ්‍ය මුරුත්තෙට්ටුවේ ආනන්ද ස්වාමීන් වහන්සේ ඉල්ලා සිටිනවා.
රට ගොඩගත හැක්කේ මහින්ද රාජපක්ෂ මහතාට පමණක් බවයි උන්වහන්සේ අවධාරණය කරන්නේ.
ඒ, අද (20) නාරාහේන්පිට අභයාරාමයේදී පැවති මාධ්‍ය හමුව අමතමින්.
මෙලෙස බලය පැවරීමකට වත්මන් ජනාධිපති ගෝඨාභය රාජපක්ෂ මහතා විරුද්ධ වුවහොත් එය ඔහු රටට කරන හානියක් බව උන්වහන්සේ පවසනවා.
ගෝඨාභය රාජපක්ෂ මහතාගේ සෞභාග්‍යයේ දැක්මෙන් මේ රට ගොඩගනිවී යැයි සිතුවද මේ වන විට 200%කින් ජනතාව ආණ්ඩුව ගැන කලකිරීමෙන් පසුවන බවයි මුරුත්තෙට්ටුවේ ආනන්ද ස්වාමීන් වහන්සේ පවසන්නේ.
“කොහොම හරි කමක් නැහැ මහින්ද මහත්තයෝ මේ රට භාර ගන්න. පංච මහා බලවේගයම කිපිලා පාරට බහින්න ඉස්සෙල්ල අපි කරන එකම ඉල්ලීම තමයි හදා ගත්ත ගෙයි අඩුපාඩු හදාගමු. නැත්නම් වෙනදෙයක් බලාගෙන ඉමු. රට ගොඩගන්න පුළුවන් මහින්ද රාජපක්ෂ මහත්තයට විතරයි. අපි ඔබතුමාගේ දෑත් ශක්තිමත් කරන්න ඉන්නවා. මේ බොල් හඬවලින් වැඩක් නැහැ.” යැයි උන්වහන්සේ පවසනවා.
