ශ්‍රී ලංකාව චීනයට වන්දනාමාන කරන තත්ත්වයට පත්ව තිබෙන හෙයින් මේ වන විට GSP සහනය අහිමි වීමේ අනතුරක් මතුව ඇති බව සමඟි ජන බලවේගයේ පාර්ලිමේන්තු මන්ත්‍රී හේෂා විතානගේ මහතා පවසයි.
මන්ත්‍රීවරයා මේ බව සඳහන් කළේ ඊයේ (11) කොළඹදී මාධ්‍ය වෙත අදහස් දක්වමින්.
චීනයට සිමා වෙමින් මෙරට ආණ්ඩුව කරයුතු කරමින් සිටින දෙස බලා යුරෝපා සංගමය ශ්‍රී ලංකාවේ ගෙල සිරකරන තැනට කටයුතු කර තිබෙන බවයි මන්ත්‍රීවරයා කියා සිටින්නේ.
දැනටමත් ඇඳේ සිටින ආර්ථිකයට හුස්මක් ගත හැක්කේ මෙම GSP සහනය යුරෝපා මත්ස්‍ය සහනය හේතුවෙන් වන හෙයින් එය අහිමි වුවහොත් රටට අත්වන ඉරණම සිතාගත නොහැකි බව මන්ත්‍රීවරයා පවසයි.
2010 අගෝස්තුවේදී එනම් මහින්ද රාජපක්ෂ සමයේදී මෙම GSP සහනය රටට අහිමි වූ අතර එය නැවත ලබා ගැනීමට හැකි වූයේ 2017 වසරේ යහපාලන ආණ්ඩුව යටතේ වන අතර නැවතත් එය අහිමි කරගන්නා තැනට කටයුතු නොකරන ලෙසයි මන්ත්‍රීවරයා ජනාධිපතිවරයාගෙන් ඉල්ලාසිටින්නේ.
