ඇමති මනූෂගේ ලේකම්වරයෙකු ලෙස පෙනී සිටිමින් විදෙස් රැකියාවන්ට මුදල් අය කළ ජාවාරම්කරු අත්අඩංගුවට ගෙන ඇතැයි විදේශ සේවා නියුක්ති කාර්යාංශය පවසනවා.
එම කාර්යාංශය පැවසුවේ, ඊශ්‍රායලයේ කෘෂිකාර්මික රැකියා ලබාදීම සඳහා ගාල්ල, බූස්ස හා වැලිගම යන ප්‍රදේශවල පදිංචි තරුණයින් දෙදෙනෙකුගෙන් සැකකරු රුපියල් ලක්ෂ 3 බැගින් මුදල් ලබාගෙන ඇති බවයි.
ඔවුන් දෙදෙනා ඒ සම්බන්ධයෙන් කළ පැමිණිලි අනුව ප්‍රකාශ සටහන් කරගැනීම සඳහා අදාළ පුද්ගලයා කාර්යාංශය වෙත කැඳවූ අවස්ථාවේදී විමර්ශන නිලධාරීන් විසින් අත්අඩංගුවට ගෙන තිබෙනවා.
සැකකරු අද දින මාතර මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
එම කාර්යාංශය වැඩිදුරටත් කියා සිටියේ, දෙරට අතර ඇති කරගෙන තිබූ ද්වි පාර්ශවික ගිවිසුමක් අනුව කෘෂි ක්ෂේත්‍රයේ රැකියා සඳහා ශ්‍රමිකයින් යොමුකරන අතර, ඊශ්‍රායලයේ කෘෂි අංශයේ රැකියා ලබාගැනීම සඳහා කිසිදු අතරමැදියෙක්ට මුදල් ලබා නොදෙන ලෙසයි.
