එක්සත් ජාතික පක්ෂයේ මිනුවන්ගොඩ ආසන බල මණ්ඩලයේ රැස්වීම ජූලි මස 30 වනදා සවස 3.30 ට මිනුවන්ගොඩ ඇලිස් පාර්ක් පිටියේදී පැවැත්වෙන බවට එම පක්ෂය නිවේදනය කරනවා.
ඒ අනුව එක්සත් ජාතික පක්ෂයේ ජ්‍යෙෂ්ඨ නායක නායිකාවන්ගේ ප්‍රධානත්වයෙන් අදාළ රැස්වීම පැවැත්වෙන බවයි වාර්තා වන්නේ.
එම රැස්වීම ජනාධිපති උපදේශක මෙන්ම මිනුවන්ගොඩ එක්සත් ජාතික පක්ෂ ප්‍රධාන සංවිධායක මහාචාර්ය ආශු මාරසිංහ මහතා විසින් සංවිධානය කරනු ලබනවා.
කෙසේ වෙතත් අදාළ රැස්වීමට සෙනඟ අද්දවාගැනීම සඳහා ජනාධිපති උපදේශක ආශු මාරසිංහ මහතා අපූරු උපක්‍රමයක් භාවිතා කර තිබෙනවා.
ඒ අනුව ‘උපන් ගමට වටින වැඩක්’ ලෙස සඳහන් කරමින් ජපානයේ රැකියා අවස්ථාවන් ලබාගැනීමට අවශ්‍ය වන පාඨමාලාවක් සඳහා ලියාපදිංචි වීමට ජූලි 30 වනදාට මිනුවන්ගොඩ ඇලිස් පාර්ක් පිටියට පැමිණෙන ලෙසට වන දැන්වීමක් පලකිරීමෙන්.
ජපන් රැකියා සිහිනය සැබෑ කරගැනීමට ඉවහල් වන රුපියල් ලක්ෂ දෙකක් වටිනා මෙම පාඨමාලාව සම්පූර්ණයෙන්ම නොමිලේ ලබාදෙන්නක් බවත් ඒ සඳහා ලියාපදිංචිවීම සඳහා පෞද්ගලික තොරතුරු සමඟ ජාතික හැඳුනුම්පතේ ඡායා පිටපතක්ද සමගින් එක්සත් ජාතික පක්ෂයේ මිනුවන්ගොඩ ආසන බල මණ්ඩලයේ රැස්වීම පැවැත්වෙන වේලාව වන ජූලි 30 සවස 3.30 ට මිනුවන්ගොඩ ඇලිස් පාර්ක් පිටියට පැමිණෙන ලෙසට අදාළ දැන්වීමේ දැක්වෙනවා.
පසුගිය මැතිවරණයෙන් එක්සත් ජාතික පක්ෂය අන්ත පරාජයක් ලැබූ අතර එම පක්ෂයේ නායකයා වූ රනිල් වික්‍රමසිංහ මහතා ඇතුළු සියලුම පක්ෂ සාමාජිකයන්ව ජනතාව විසින් ප්‍රතික්ෂේප කර ගෙදර යවනු ලැබූවා.
